Azərbaycan Mərkəzi Bankı (AMB) aprelin 23-də uçot faiz dərəcəsi ilə bağlı qərarını açıqlayıb. Mərkəzi Bankın İdarə Heyəti uçot dərəcəsini 7,25%, faiz dəhlizinin aşağı həddini 6,25%, faiz dəhlizinin yuxarı həddini isə 8,25% səviyyəsində dəyişməz saxlayıb.
Modern.az mövzu ilə bağlı Milli Məclisin deputatı Vüqar Bayramovla və iqtisadçı ekspert Eyyub Kərimli ilə həmsöhbət olub.
Vüqar Bayramov bildirib ki, Mərkəzi Bank uçot stavkası ilə bağlı qərar qəbul edən zaman mövcud makro iqtisadi vəziyyət, eyni zamanda infilyasiya səviyyəsi və bir sıra digər xarici faktorları nəzərə alır:
“Nəzərə alsaq ki, infilyasiya səviyyəsi Mərkəzi Bankın proqnozlaşdırdığı diapazonda dəyişir, makro iqtisadi sabitlik də davam edir, bütün bunlar AMB tərəfindən uçot dərəcəsi ilə bağlı qərar qəbul edilən zaman mövcud vəziyyətə uyğun olaraq dərəcələrin dəyişdirilməməsinə gətirib çıxarır. Bizim də uçot stavkası ilə bağlı yanaşmamız ondan ibarətdir ki, bütövlükdə AMB-nin uçot stavkasının daha aktiv şəkildə həm kredit faizlərinə, həm də bank sektoruna təsirləri müşahidə olunsun. Çünki biz praktiki olaraq Mərkəzi Bankın uçot faiz dərəcəsinin son dövrlər dəyişməz saxlanılmasına baxmayaraq kredit faizlərində artımlar müşahidə edirik. Depozitlər üzrə dividentlərdə artım var. Bütün bunlar ondan xəbər verir ki, Mərkəzi Bank uçot faiz dərəcəsinin daha təsirli alətə çevrilməsi ilə bağlı işlərin daha sistemli şəkildə həyata keçirilməsi, bu istiqamətdə islahatların daha da dərinləşməsinə ehtiyac var”.
Eyyub Kərimli bildirib ki, uçot dərəcəsinin dəyişməsi monetar və fiskal siyasətin əsas idarəedici rıçaqlarından biridir:
“Bu baxımdan hesab edirəm ki, uzun müddətdir ölkədə uçot dərəcəsinin sabit saxlanması həm infilyasiyanın dərəcəsini tənzimləyir, həm də ölkədə pul tədavülünün həcmini tənzimləyir. Bu digər tərəfdən də həm manatın sabitliyinə təsir göstərir, həm ölkədə iqtisadi aktivliyin səmərəliliyini artırır. Bu baxımdan hesab edirəm ki, AMB uçot dərəcəsinin sabit saxlanılmasında həm də ölkədə infilyasiya tərəddüdlərinin qarşısını almağa çalışır və iqtisadi sabitliyin davam etməsinə öz töhfəsini verir”.
