Azərbaycanda dövlət dəstəyi ilə təqdim edilən güzəştli aqrar sığorta mexanizmi vasitəsilə pambıq sahələrinin sığortalanması prosesinə start verilib.

Modern.az Kənd Təsərrüfatı Nazirliyinə istinadən xəbər verir ki, fermerlər dövlətin 50%-lik sığorta haqqı dəstəyindən istifadə etməklə pambıq sahələrini sərfəli şərtlərlə sığorta edə bilərlər. 

Pambıq Azərbaycanın 20-yə yaxın rayonunda becərilən əsas texniki bitkilərdən sayılır. Hazırda Azərbaycanda 110 min hektara yaxın ərazidə pambıq becərilir. Pambıq sahələrinin böyük hissəsi Mil Muğan, Salyan-Şirvan və Mərkəzi Aran iqtisadi zonalarının payına düşür. Ölkənin əsas pambıqçılıq rayonları Sabirabad, Saatlı, Ağcabədi, Salyan, Bərdə və digər rayonlardır.

Pambıq əkinlərinə ən çox zərər vuran hallar dolu, sel-subasma və leysan hadisələridir. Dövlət dəstəkli aqrar sığorta mexanizmi bütün bu halların vurduğu zərəri qarşılayır. İndiyədək zərərlə üzləşmiş yüzlərlə fermerə aqrar sığorta mexanizmi vasitəsilə ödənişlər edilib.

Mövcud aqrar sığorta mexanizmi qeyd olunan təbiət hadisələri ilə yanaşı, yanğın, vəhşi heyvanların hücumu, 3-cü şəxslərin hərəkətləri və sair hallar nəticəsində dəyən zərərləri də qarşılayır.

Pambıq sahəsini sığorta etdirmək fermerə cüzi məbləğə başa gəlir. Ölkənin əksər rayonlarında 1000 manatlıq pambıq məhsulunun sığortası cəmi 7-10 manat ətrafında dəyişir.

Ölkəmizdə sığortalanmış pambıq sahələrinin sahəsi ildən-ilə genişlənməkdədir.

Belə ki, 2023-cü ildə ölkədə 14 min hektar pambıq sahəsi sığorta edildiyi halda, 2024-cü ildə sığortalanan pambıq əkinlərinin sahəsi 2 dəfə artaraq 29 min hektara yaxınlaşıb.

Sığortalanmış pambıq sahələrinin sahəsi ilə yanaşı, pambıq becərən fermerlərə dəymiş zərərə görə sığorta ödənişlərinin həcmi də artır. 2023-cü ildə 686 hektar sahəyə dəymiş zərərlər üzrə fermerlərə 386 min manat sığorta ödənişi edildiyi halda, 2024-cü ildə təqribən 4 min hektar əraziyə dəymiş zərərlər üzrə fermer və təsərrüfatlara ümumilikdə 880 min manatdan artıq sığorta ödənişi edilib.

Aqrar Sığorta Fondunun İdarə Heyətinin sədri Fuad Sadıqovun sözlərinə görə,  hazırda Azərbaycanda təxminən 110 min hektar ərazidə pambıq əkilir. Bunun  30 min hektarı sığortalanır. Bu il artıq 15 min hektar pambıq əkilmiş ərazi sığortalanıb.