2025-ci ilin yanvar-mart ayları ərzində kənd təsərrüfatı məhsullarının ümumi istehsal həcmi əvvəlki ilin eyni dövrü ilə müqayisədə 1,9 faiz artmışdır. Dövlət Statistika Komitəsinin məlumatına əsasən, kənd təsərrüfatı məhsullarının faktiki qiymətlərlə ümumi dəyəri 1 milyard 601,6 milyon manat təşkil etmişdir. Bu məbləğin 94,3 faizi və ya 1 milyard 510,1 milyon manatı heyvandarlıq, 5,7 faizi və ya 91,5 milyon manatı isə bitkiçilik sahəsinin payına düşür.

Eyni dövrdə kənd təsərrüfatı, meşə və balıqçılıq sahələrinin ümumi daxili məhsulda (ÜDM) payı 3,1 faiz təşkil etmişdir.

2025-ci ilin ilk üç ayında süd istisna olmaqla bütün əsas kənd təsərrüfatı məhsullarının istehsal həcmi artmışdır. Ət (diri çəkidə) istehsalı 141,6 min ton olmaqla ötən illə müqayisədə 1,7 faiz artmış, yumurta istehsalı 583,1 milyon ədəd olmaqla 2,0 faiz artmış, tərəvəz istehsalı isə 110,1 min ton olmaqla 14,0 faiz artmışdır. Süd istehsalında isə cüzi azalma müşahidə olunaraq 502,8 min ton səviyyəsində qeydə alınmışdır ki, bu da ötən ilin eyni dövrünə nisbətən 0,3 faiz azdır.

Yazlıq əkin sahələrinin ümumi həcmi 2025-ci ilin yanvar-mart aylarında 122,2 min hektar təşkil etmiş və bu göstərici əvvəlki ilin müvafiq dövrü ilə müqayisədə 0,5 faiz artmışdır. Bu dövrdə dənlilər və dənli paxlalı bitkilərin (qarğıdalı istisna olmaqla) əkini 18,9 min hektara çatmışdır ki, bu da 6,9 faiz artım deməkdir. Qarğıdalı əkinləri isə 5,1 min hektara yüksələrək ötən ilə nisbətən 70,0 faiz artmışdır.

Digər diqqətçəkən artımlar isə dən üçün günəbaxan (192,7 faiz), vələmir (116,9 faiz), şəkər çuğunduru (115,7 faiz), bostan bitkiləri (112,1 faiz) və sair yazlıq bitkilər (198,1 faiz) üzrə qeydə alınmışdır. Əksinə, kartof (96,2 faiz), tərəvəz (98,5 faiz), birillik otlar (97,2 faiz) və çoxillik otların (90,6 faiz) əkin sahələrində azalma müşahidə edilmişdir.