Ət məhsulları bazarında ucuz kolbasa və sosis məhsulları artmaqdadır. Bu məhsulların tərkibi, görünüşü və dadı bəzən orijinal ət məhsuluna bənzəsə də, onlar sağlamlıq üçün ciddi risk mənbəyidir. Aşağı keyfiyyətli, naməlum əlavələr və sintetik maddələr ilə hazırlanan məhsullar orqanizmə mənfi təsir göstərir. Bu cür məhsulların bazarda geniş yayılması daha çox iqtisadi maraqlara söykənir.

Qida məsələləri üzrə, ekspert Fərid Səfərov mövzu ilə bağlı Modern.az saytına açıqlama verib.

Ekspert təəssüflə qeyd edib ki, son zamanlar qidaların keyfiyyəti, tərkibi ilə bağlı xoşagəlməz hallar tez-tez ortaya çıxır.

“Qida istehsalçıları müəssisələrdə çox ciddi şəkildə keyfiyyət standartları tətbiq etməlidirlər, bu işin əsas qaydalarından biri keyfiyyətli məhsul istehsalıdır.

Digər məsələ isə hazırlanan məhsulun tərkibi, istifadə olunan xammalın keyfiyyəti, istehsal zamanı heç bir xətanın baş verməməsidir”.

Fərid Səfərov qeyd edib ki, işlənmiş ət məhsullarının (kolbasa, sosiska) ziyanları haqda olduqca geniş araşdırmalar aparılıb:

“İşlənmiş qidalar müxtəlif xəstəliklərə yoluxma riskini artırır. Bu qidalar yüksək miqdarda doymuş yağ və kalori ehtiva edir, tərkibində təzə ətdə olmayan yüksək miqdarda duz və kimyəvi maddələr var.

İşlənmiş ət yemək xərçəng, piylənmə, ürək-damar xəstəlikləri, böyrək xəstəliyi, Pankreatit, şəkər xəstəliyi riskini artırır”.

Müsahib söyləyib ki, tərkibindəki yüksək miqdarda olan dadlandırıcı, rəngləndirici kimi kimyəvi maddələr bu qidalardan asılılıq yaradır.

“Kolbasa və sosiska məhsulları təzə əti və təbii əti heç bir şəkildə əvəz etməyəcək. Buna görə də onu qida rasionunuza daxil etməyin, istifadə edirsinizsə, təcili şəkildə çıxarın! “-deyə, Fərid Səfərov deyib.

O bildirib ki, düzgün istehsal olunmayan, düzgün saxlanılmayan, tərkibi tam aydın olmayan heç bir qida məhsulunu evinizə almayın, süfrənizə qoymayın!

Zərif Sofiyeva