Son vaxtlar bank kartlarına edilən kiberhücumların sayı kəskin şəkildə artıb. Vətəndaşların şəxsi kart məlumatlarını əldə edən kibercinayətkarlar hər gün böyük məbləğlərdə pul vəsaitləri oğurlayırlar.

Vətəndaşlara edilən xəbərdarlıqlarla yanaşı, bankların da tədbirlər görməsi vacibdir. Bir sıra banklar kart sahiblərinin məlumatlarını qorumaq üçün innovativ texnologiyalara, çoxmərhələli doğrulama sistemlərinə və mütəmadi maarifləndirmə kampaniyalarından istifadə edirlər.

İqtisadçı ekspert Elşən Bağırzadə Modern.az-a deyib ki, banklar ilk növbədə kibertəhlükəsizlik tədbirlərini gücləndirməlidirlər.

“Artıq bu istiqamətdə addımlar atılır. Bunlara güclü şifrələmə, iki mərhələli identifikasiya, “firewall” sistemləri və mütəmadi təhlükəsizlik yoxlamalarının vacibliyi aiddir. Bu tədbirlər vətəndaşların maliyyə məlumatlarının təhlükəsizliyini təmin etməyə yönəlib. Ancaq bu işin digər tərəfi də var. Yəni bank kartı sahiblərinin maariflənməsidir”.

Ekspert deyib ki, bank kartlarından pulların çəkilməsinin önəmli hissəsi əsasən bank kartı sahiblərinin təhlükəsizlik qaydalarına əməl etməməsidir. Buna görə də qeyd edilən istiqamətdə vaxtaşırı maarifləndirmə həyata keçirilməlidir. “Banklar telefon mesajları vasitəsilə vaxtaşırı öz müştərilərini məlumatlandıra bilər. Eyni zamanda, nəzərə alsaq ki, bu kimi hallar bütövlükdə ölkənin bank sisteminə olan inamın sarsılmasına da gətirib çıxarır, onda Mərkəzi Bank da bu istiqamətdə işlər görməlidir. Vaxtaşırı televiziya, radio verilişləri hazırlanıla bilər, xüsusilə də bölgələrdə maarifləndirmə xarakterli kampaniyalar təşkil edilə bilər.

Nəzərə alsaq ki, bu cür hallara məruz qalanlar əsasən maliyyə və texnoloji savadlılığı aşağı olan insanlardır, onda deyə bilərik ki, maarifləndirmə çox önəmli vasitədir.  Bundan başqa, qanunvericilikdə bu kimi hallara qarşı cəzalar daha da sərtləşdirilməlidir ki, dələduzlarda müəyyən çəkindirici effekt yaransın”,- deyə Elşən Bağırzadə söyləyib.

Zərif Sofiyeva