Paytaxtın bəzi supermarketlərində elə qida məhsulları satılır ki, onların üzərində istehsal yeri, son istifadə tarixi, tərkibi haqqında məlumatlar yoxdur. Nəticədə əksər alıcılar arasında bu məhsullara qarşı şübhə və narazılıqlar artır. Əsasən də süd məhsullarının qablaşmalarında belə hallara rast gəlinir.

Qida məsələləri üzrə ekspert Fərid Səfərov Modern.az-a bildirib ki, satışa çıxarılan hər bir ərzağın qida dəyəri yüksək, sağlam, keyfiyyətli, təzə olmalıdır. Bunun üçün də qida istehsalı ilə məşğul olan sahibkarlar müxtəlif qaydalara əməl etməlidirlər.

Ekspertin sözlərinə görə, bu qaydalardan biri də hazır olan məhsulun üzərində bütün məlumatların olmasıdır. Məhsulun istehsal olunduğu tarix, son istifadə müddəti, saxlama qaydası, tərkibi və s. bunlara aiddir.

“Təəssüf ki, əksər hallarda satışda bu qaydalara əməl olunmadan, pərakəndə şəkildə hazır mallara, süd məhsullarına, yumurtaya və s. rast gəlmək olur. Bu cür qidaların mənşəyi, istehsal olunduğu tarix, yer, istifadə olunan xammalın keyfiyyəti bilinmir. Düzgün qablaşdırmada və temperaturda saxlanılmır. Bu, daha çox gəlir əldə etmək istəyən, qida ilə heç bir əlaqəsi və məlumatı olmayan "işbazların" işidir və nəticəsi demək olar ki, çox vaxt yaxşı olmur”, - deyə o bildirib.

Ona görə də alıcılara məsləhət görülür ki, qida alış-verişi zamanı çox diqqətli olsunlar. Alınan qidanın görüntüsünə, qoxusuna, qablaşdırmasına, sonra istehsal tarixinə, tərkibinə baxsınlar.

Hətta satış ilə məşğul olan insana belə baxın, çünki satıcının gigiyena qaydalarına əməl etməsi də həyat qurtarar.

Zərif Sofiyeva