Son həftələr havanın kəskin şəkildə dəyişməsi, aramsız yağışlar paytaxt və bölgələrdə bəzi problemlər yaradıb. Bir sıra ərazilərdə yağış suları evlərin hətəini basıb, yollarda hərəkəti çətinləşdirib.

Ekologiya və Təbii Sərvətlər Nazirliyi yanında İctimai Şuranın sədri ekoloq Amin Məmmədov Modern.az-a bildirib ki, xüsusilə paytaxt ərazsində yağış rezervuarlarının tikilməsi su ehtiyatlarının idarə edilməsi konsepsiyasına daxildir. Rezervuarların inşası üçün ilk olaraq, kanalizasiya sistemləri tam şəkildə yenilənməlidir.

Amin Məmmədov qeyd edib ki, keçmiş sovetlər dövründə yağış sularının toplanıb bir yerə axması üçün yol kənarlarında xəndəklər və ya borular inşa edilirdi. Lakin indi çəkilən yolların çoxunda bu, nəzərə alınmayıb. Nəticədə əsasən də tunellərdə güclü yağışlar zamanı subasma halları qeydə alınır.

“Bakıda su təchizatı ayrıca bir sistem kimi təşkil olunub. Bakıdan Ceyranbatan ərazisi arasında su boruları qoyulmuşdur. Burada yağış sularının Xəzər dənizinə axıdılması həyata keçirilməlidir. Rezervuarlar üçün isə xüsusi yerlər ayrılmalıdır. Lakin paytaxtda binaların sıx, əhalinin çox olmasını nəzərə alaraq, bu baş plana daxil edilməli, ayrıca tədqiqat aparılmalıdır”, -deyə ekspert vurğulayıb.

Ekoloqun sözlərinə görə, həyət evlərində bunu pilot layihə kimi həyata keçirtmək olar. Lakin birinci, texniki-iqtisadi əsaslanma işləri aparılmalı, yağışların intensivliyi tədqiq edilməlidir. Gələcək üçün bunlar plana daxil edilib. Amma onun işlənməsi üçün zaman və vəsait ayrılmalıdır.

"Bakı ərazisində il ərzində 2-3 dəfə normadan artıq yağıntı qeydə alınır. Bu tip layihələr yağışların çox yağdığı (Astara və digər bölgələr) ərazilərdə tətbiq edilə bilər. Ona görə də, iqlim amilləri də mütəxəssislər tərəfindən təhlil olunmalıdır (harada, necə tikmək olar, axıdılan sular haraları təmin edəcək? Sənaye, yaşıllıqların sulanması..) .

İki ilə yaxındır, Dövlət Su Agentliyi təsis edilib. Qurum məsələni dəqiq araşdırıb, konsepsiya planı təqdim etməlidir”.

Zərif Sofiyeva