2025-ci ilin yanvar-aprel aylarında Azərbaycanın xarici ticarətində ciddi artım müşahidə olunub. Modern.az Dövlət Gömrük Komitəsinin açıqladığı statistikaya əsasən xəbər verir ki , xarici ticarət dövriyyəsi ötən ilin eyni dövrü ilə müqayisədə 24 faizdən çox artaraq 16 milyard 917,6 milyon ABŞ dolları təşkil edib. bu artım əsasən idxalın çoxalması hesabına baş verib.
Müqayisə üçün bildirək ki, 2024-cü ilin ilk dörd ayında bu göstərici 13 milyard 633,3 milyon dollar idi.
İdxal ciddi şəkildə artır
Statistikaya əsasən, ixrac 2025-ci ilin yanvar-aprel aylarında 8 milyard 784,7 milyon dollar olub. Bu, ötən ilin eyni dövrü ilə müqayisədə 616,1 milyon dollar və ya 7,5 faiz çoxdur.
Lakin idxalda artım daha kəskindir. Belə ki, 2024-cü ilin ilk dörd ayında 5 milyard 464,7 milyon dollar olan idxal həcmi 2025-ci ildə 8 milyard 132,9 milyon dollara yüksəlib. Artım 48,8 faiz təşkil edir. Bu isə xarici ticarət balansında ciddi fərq yaradıb.
Xarici ticarətdə müsbət saldo 75 faizdən çox azalıb
2024-cü ilin yanvar-aprel aylarında xarici ticarət saldosu 2 milyard 703,8 milyon dollar səviyyəsində olsa da, 2025-ci ilin eyni dövründə bu göstərici cəmi 651,7 milyon dollar olub. Bu isə müsbət saldonun 2 milyard dollardan çox azalması və 75,9 faiz geriləməsi deməkdir.
Qeyd edək ki, ixracın xarici ticarət dövriyyəsindəki xüsusi çəkisi ötən il 59,92 faiz idisə, 2025-ci ildə bu göstərici 51,93 faiz təşkil edib. Əksinə, idxalın xüsusi çəkisi 40,08 faizdən 48,07 faizə yüksəlib.
Mütəxəssislər hesab edir ki, idxalın bu qədər sürətlə artması yerli istehsalın hələ də bir çox sahələrdə xarici məhsullarla rəqabət apara bilmədiyini göstərir. Uzunmüddətli perspektivdə bu tendensiya xarici ticarət balansında disbalans yarada bilər. ekspertlər ixracın şaxələndirilməsinin, qeyri-neft sektorunun gücləndirilməsinin və yerli istehsalın stimullaşdırılmasının vacibliyini vurğulayırlar.
Yerli məhsul istehsalının bəzi sahələrdə zəif olması xarici mallara olan tələbatı artırır. Xüsusilə yüksək texnologiyalı avadanlıq, dərman, maşın və elektronika kimi sahələrdə yerli istehsal kifayət qədər inkişaf etmədiyindən idxala ehtiyac yaranır.
