Naxçıvanda “Kiber suverenlik” mövzusunda keçirilən müzakirələrdə diqqət cəlb edən məsələlərdən biri də Daxili İşlər Nazirliyi (DİN) rəsmisinin açıqlaması olub. Panel müzakirəsində çıxış edən DİN-nin İnformasiya və Kibertəhlükəsizlik şöbəsinin rəisi Hikmət Məmmədov bildirib ki, son 4 ayda vətəndaşların bank kartlarından 6 milyon manat oğurlanıb.

Modern.az xəbər verir ki, Azərbaycan İnternet Forumunun sədri, informasiya texnologiyaları üzrə ekspert Osman Gündüz məsələyə münasibət bildirib.

“Nəzərə alsaq ki bir çoxları ümumiyyətlə, kartlarından oğurluq haqqında rəsmi məlumat vermir, bu o deməkdir ki, hər ay kartlardan təxminən 2 milyon manat talanır. Əslində DİN-in rəsmi açıqlamasından sonra Mərkəzi Bank dərhal reaksiya verməli, problemə aydınlıq gətirməlidir. Hələlik isə bunlar müşahidə olunmur”, - O.Gündüz bildirib.

O qeyd edib ki, bank kartlarından kütləvi talamalar tam adiləşib.

“Artıq hər gün gözləyirik ki, DİN rəsmisi kartlardan nə qədər pul oğurlandığını açıqlayacaq. Bu nə vaxta qədər belə davam edəcək? Mərkəzi Bank, banklar, hökumət və hüquq-mühafizə qurumları bu təhlükəyə qarşı konkret nəticə verəcək tədbirləri nə vaxt görəcək?
Fikrimcə, nə qədər faydalı və vacib olsa da, maariflənmə və rəqəmsal savadlılıqla bu problemi tez bir zamanda həll etmək çətin olacaq”.

Osman Gündüz banklara, Mərkəzi Banka, ümumiyyətlə, hökumətə və cəmiyyətə zərbə vuran bu vəziyyətin düzəlməsi istiqamətində faydalı ola biləcək təkliflər irəli sürüb. O deyib:

"1. Ən çox oğurluq olan banklar haqqında məlumatlar şübhəsiz ki, Mərkəzi Bankda və DİN-dədir.
Bu məlumatların açıqlanması banklara qarşı ciddi ictimai qınaq yarada və maliyyə sektorunun məsuliyyətini daha da artıra bilər.
Güman ki bankların ciddi itkilər verə biləcəyindən ehtiyatlanan Mərkəzi Bank bu tip məlumatları açıqlamayacaq.
DİN-in hər gün açıqladığı statistika çox əhəmiyyətlidir. Düşünmək olar ki DİN-ə qarşı da müəyyən təsirlər var ki, ən çox talanma olan bankların adları açıqlanmasın.
Belə olan halda isə bu problemin qanunvericilik baxımından həll edilməsi mövcud problemin həllinə çox kömək edə bilərdi.

2. Mərkəzi Bank qaydalarına əl gəzdirməlidir, identifikasiya işləri sərtləşdirilməlidir, banklar oğurlanmış vəsaitlərə görə məsuliyyət daşımalıdır.
“Siz təsdiqləmisiniz” deyərək məsuliyyətdən yayınmaq qəbulolunmazdır.
Mobil tətbiqlərin kodları audit olunmalıdır, əvvəllər problemi olan banklardan məlumat sızması araşdırılmalıdır.

3. Banklarda və mobil operatorlarda müştəri məlumatlarına çıxışı olan şəxslərə nəzarət gücləndirilməli, daxili audit sistemləri qurulmalıdır. Xarici vətəndaşların bu sahədə işləməsi qanunla məhdudlaşdırılmalıdır.
Maraqlıdır ki, mövcud hüquqi normalara görə kritik qurumu audit edən kiberprovayderdə xarici vətəndaş işləyə bilməz, amma kritik qurumun həssas strukturlarında “xarici vətəndaş işləyə bilməz” deyən bir müddəa yoxdur.

4. Mobil tətbiqlərdə “kreditə STOP” və kartdan oğurluqla bağlı anında məlumat verilməsi üçün “SOS” əlaqə imkanı yaradılmalıdır.

5. Fərdi məlumatların qorunması haqqında qanun sərtləşdirilməli, bank kartlarından talama ilə bağlı cinayət məsuliyyəti ağırlaşdırılmalı, bankların və operatorların hüquqi məsuliyyəti konkretləşdirilməlidir".