Azərbaycanda ipoteka kreditləri ilə mənzil alanların əksəriyyəti kiçik və orta ölçülü evlərə üstünlük verir.

Modern.az-ın İpoteka və Kredit Zəmanət Fondundan əldə etdiyi məlumata görə ən çox kredit 41-60 kvadrat metr və 61-80 kvadrat metr aralığında olan mənzillərə verilib. Belə ki, bu sahədə müvafiq olaraq 17180 və 15994 mənzil ipoteka yolu ilə satılıb.

Daha kiçik sahəyə malik, yəni 41 kvadratmetrdən az olan mənzillərin sayı 3169, 81-100 kvadratmetr olanların sayı 8149, 101-120 kvadratmetr olanlar 3941, 120 kvadratmetrdən böyük mənzillər üzrə isə 5107 kredit verilib.

Beləliklə, ipoteka bazarında əsas tələbat 1 və 2 otaqlı mənzillərədir. Kiçik sahəli mənzillərə marağın əsas səbəbi onların daha uyğun qiymətə təklif olunması, ilkin ödənişin və aylıq kredit ödənişlərinin daha əlçatan olması ilə bağlıdır. Bundan əlavə bu tip mənzillərə kirayə bazarında da yüksək tələbat var.  Gənc ailələr, subay şəxslər və ya gəlir məqsədilə ev alan investorlar bu seqmentə üstünlük verirlər.

Böyük ölçülü, xüsusən də 81 kvadratmetrdən yuxarı mənzillərə ipoteka kreditinə  maraq daha azdır. Bu da həmin mənzillərin daha bahalı olması və ödəniş şərtlərinin daha ağır düşməsi ilə bağlıdır. Aydın olur ki, ipoteka krediti əsasən orta gəlirli ailələrin seçimidir və bazar da bu ehtiyaclara uyğun formalaşır.