Bu gün mobil telefonlar hər bir şəxsin gündəlik həyatının ayrılmaz hissəsinə çevrilib. Son illər ölkə əhalisinin maddi gəlirləri artdıqca isə insanlar texnologiyanın müasir imkanlarından istifadə etmək arzusu ilə daha geniş texniki funksiyaları olan telefonlar əldə etməyə çalışırlar. Lakin bu cür telefonlar elə də ucuz olmadığından alıcılar daha çox kredit şərtlərindən istifadə edirlər. İlk baxışdan kredit təklifləri alıcıların maraqlarına xidmət etdiyini düşünmək olar. Bu düşüncə isə arayışsız və faizsiz kredit təklifinin reklamları hesabına formalaşır. Əslində isə kredit telefon satan şirkətlərə sərf edir. Çünki onlar müştərilərin maragından və nağd telefon almaq imkanlarının məhdudluğundan istifadə edərək öz maraqlarını təmin edirlər. Belə şirkətlərdən biri də telefon satışı sahəsində özünün “müsbət imic” qazandığını iddia edən “İrşad Telecom”dur.
“İrşad Telecom” əvvəllər, yəni 4-5 bundan öncə geniş kredit siyasəti yeridərək özünə müəyyən alıcı kütləsi toplaya bilmişdi. Lakin son 2 ildə şirkətin kredit şərtlərindəki mənfi mənada yeniliklər onlara inamı azaltmaqla yanaşı, müştərilər arasında geniş narazılıqlar yaradır. Belə ki, müxtəlif dövrlər üçün fərqli “cibəgirmə varintları” fikirləşən şirkət “qızıl zəmanət”dən tutmuş “onlayn kredit” təklifinə qədər müxtəlif müştəri aldatma metodlarından istifadə edib və etməkdə davam edir. Ay ərzində mobil nömrəyə göndərilən təklif mesajları isə dayanmaq bilmir.
Faizsiz məhsul satışı adı ilə elan olunan reklamların arxasında “qızıl zəmanət” adlı “faiz” dayanır. Belə ki, kreditlə telefon aldıqda məcburi qaydada müştərinin “maraqları” nəzərə alınaraq telefona 10 faizli QIZIL ZƏMANƏT tətbiq edilir. Yəni adətən şirkətlər satdıqları mala zəmanəti pulsuz verdikləri halda, “İrşad Telekom” bu zəmanəti malın qiymətinin 10 faizi məbləğinə satır.
Bu zəmanətdən istifadə etmək istəyən müştərilər isə 10-15 gün telefonsuz qalmalı olurlar ki, ikinci telefonu olmayanlar avtomatik olaraq bu təklifdən imtina edirlər. Çünki zəmanətin şərtlərinə görə telefonda yaranan hər hansı problemin aradan qaldırılması üçün telefonun bu müddət ərzində servisdə qalması tələb olunur. İndiki dövrdə kimsənin 1 gün belə telefonsuz qalmasını təsəvvür belə etmək istəmədiyi halda, telefonun 10-15 gün təmirdə qalması nə dərəcədə müştəri məmnuniyyətinə və xidmət səviyyəsinə uyğundur? Məncə burada “məqsəd” aydındı.
“Onlayn kredit sifarişi” təklifi isə sadəcə müştərilərlə məzələnməyə bənzəyir. Onlayn müraciət edənlərə səbrli və təmkinli olmaları tövsiyyə edilərək, mütləq onlarla əlaqə saxlanılaraq məlumat veriləcəyi bildirilir. Müştəri bu cavabı nə qədər gözləməlidir? Şirkətin kefi nə qədər istəyir, o qədər. Çünki ya ümumiyyətlə əlaqə saxlanılmır, ya da əlaqə saxlanıldıqdan sonra müəyyən məqamları aydınlaşdırmaq üçün alıcı əksər halda mağazaya dəvət edilir. Yəni alıcı yenə vaxtını itirməklə yanaşı, mağazada əlavə aksesuarlarla təklifi ilə yüklənir. Yeri gəlmişkən, kabura, yaddaş kartı və digər aksesuarlar digər yerlərdəkindən çox baha qiymətinə bütün alıcılara təklif edilir və “sakit” müştərilərə, belə demək olarsa, sırınır.
“İrşad Telekom”un ən son “yeniliyi” isə yeni ildən tətbiq edilməyə başlanılıb. Belə ki, təkrar müştərilərin iş yerlərinin yenidən araşdırılmasınin vacib olduğu bildirilir və ya əks halda 10 manat komsiyon ödəmək tələb olunur. Siirkətin mağazasında olarkən məlum oldu ki, yeni sistemə keçidlə əlaqədar olaraq bütün müştərilərin iş yerlərinə zəng olunub yenidən dəqiqləşdirilməlidir və ya 10 manat ödəniş olunmalıdır. Mənqitlə yanaşdıqda, yeni sistem ideyasının məqsədi yalnız “əlavə 10 manat qazanmaqdır”. Çünki 4-5 ildir şirkətin müştərisi olan problemsiz bir şəxsin yenidən iş yerinin təsdiq olunmasının məqsədi nədir ki? Əgər müştəri krediti ödəyə bilirsə onun iş yerinin əhəmiyyəti nədir? Sadəcə şirkət “ideoloqları” yaxşı bilir ki, hər dəfə hansısa kredit işinə görə iş yerinə zəng edilməsi işçi üçün müsbət qarşılanmır və bunu nəzərə alan müştərilərin əksəriyyəti məcburən 10 manatı ödəməyi üstün tuturlar. Bir neçə ildir müştəri olduqlarını və ilk kredit zamanı iş yerinin, 3-4 qohum əqrabasının telefon nömrələrinin saatlarla araşdırılmasından sonra kredit ayrıldığını bildirdikdə məlum olur ki, müştəri sistemdə işsiz kimi göstərilib. Yəni yeni sistemə keçid zamanı “İrşad Telekom”un “qərarı” ilə müştərilər işdən “çıxarılıblar”. Görəsən niyə?
P.S. Satışa dəxli olmayan bir məqamda maraq doğurur. Belə ki, şirkətin saytında və reklamlarında əlaqə üçün yalnız bir qısa nömrə təqdim edilir ki, həmin nömrə də demək olar ki, hər zaman məşgul olur. Saytda mağazaların ünvanları təqdim edilsə də, nə onların əlaqə vasitələri, nə də baş ofislə əlaqə saxlamaq üçün heç bir əlavə telefon nömrəsi göstərilmir. Müştəri şikayətini və ya minnətdarlığına şirkətə neçə çatdırmalıdır?
P.Rəhimoğlu
