Milli Məclis 2016-ci ilin dövlət büdcəsinə edilən dəyişikliyə baxmağa hazırlaşır.
Mili Məclisin İqtisadi siyasət, sənaye və sahibkarlıq komitəsindən Modern.az saytına verilən məlumata görə, sabah 2016-ci ilin büdcəsi yenidən müzakirə ediləcək. Büdcə layihəsinə dəyişiklik sabah saat 11-də komitədə müzakirəyə çıxarılacaq.
“Azərbaycan Respublikasının 2016-cı il dövlət büdcəsi haqqında” və “Azərbaycan Respublikası Dövlət Sosial Müdafiə Fondunun 2016-cı il büdcəsi haqqında” qanun layihələrinə ediləcək dəyişiklər ilk olaraq parlamentin İqtisadi siyasət, sənaye və sahibkarlıq komitəsində baxılacaq və deputatlarla birlikdə müzakirə ediləcək.
Qeyd edək ki, 2016-cı il üzrə yenilənmiş dövlət büdcəsinin gəlirləri 16 mlrd. 822 mln. manat, xərcləri isə 18 mlrd. 495 mln. manat nəzərdə tutulub.
2016-cı il üçün dövlət büdcəsinin dəqiqləşdirilmiş gəlirləri 2016-cı il üçün təsdiq olunmuş proqnozla müqayisədə 2256, mln. manat və ya 15,5% çoxdur. 2016-cı il üçün dövlət büdcəsinin dəqiqləşdirilmiş xərcləri isə 2016-cı il üçün təsdiq olunmuş proqnozdan 13,7% çoxdur.
Xatırladaq ki, 2016-cı il dövlət büdcəsinin təsdiqlənmiş versiyasında büdcənin gəlirləri 14,566 mlrd. manat, xərcləri isə 16,264 mlrd. manat səviyyəsində olacağı nəzərdə tutulmuşdu.
Maliyyə naziri Samir Şərifovun sözlərinə görə, cari ilin dövlət büdcəsinə yenidən baxılıb, gəlir və xərclər hissəsi 2 milyard manat artırılıb.
Aytən ZƏHRA
