Jurnalist, ADA Universitetinin Kommunikasiya və rəqəmsal media proqramının rəhbəri Şəfəq Mehrəliyeva sosial şəbəkədə devrilmiş İran şahı Məhəmmədrza Pəhləvinin həyat yoldaşı, “Şahbanu” titullu Fərəh Pəhləvi ilə birgə fotosunu paylaşıb.
“İllər əvvəl Fərəh Pəhləvi ilə ABŞ Konqresində Novruzu qeyd edərkən Şahbanu ilə Azərbaycan dilində bayramlaşdıq”,- deyə Şəfəq Mehrəliyeva fotoşəkli şərh edib.
Modern.az-ın məlumatına görə, şəkil sosial şəbəkə izləyiciləri tərəfindən maraqla qarşılanıb.
Xatırladaq ki, Şəfəq Mehrəliyeva (Akifqızı) uzun müddət AZƏRTAC Dövlət Agentliyinin ABŞ üzrə xüsusi müxbiri işləyib.
Fərəh Pəhləvi İran şahı Məhəmmədrza Pəhləvinin 3-cü arvadıdır. O, şahın arvadları arasında “Şahbanu” titulunu almış yeganə xanımdır.
Fərəh Pəhləvi şahın əvvəlki iki arvadından fərqli olaraq ona varis (oğlan övladı) dünyaya gətirə bilmişdi.
Şahın üç xanımı arasında yalnız onun üçün tacqoyma mərasimi (1967) keçirilib, ona “Şahbanu” titulu verilib. 21 yaşlı Fərəh və 40 yaşlı Məhəmməd Rza Pəhləvinin toyu 1959-cu il dekabrın 21-də baş tutmuşdu. Bu evlilikdən onların dörd övladı olub: Rza Kir Pəhləvi (1960), Fərəhnaz Pəhləvi (1963), Əli Rza Pəhləvi (1966), Leyla Pəhləvi (1970).
Məhəmməd Rza Pəhləvi 16 sentyabr 1941-ci ildən 11 fevral 1979-cu il tarixinədək İranda şahənşah olub. 1979-cu ildə İranda şahənşahlıq ləğv olunub, inqilab nəticəsində şah hakimiyyəti devrilib və İran İslam Respublikası elan edilib.
Nəticədə vətənini tərk edərək mühacirətə yollanan şah 27 iyul 1980-ci ildə 60 yaşında Misirin paytaxtı Qahirədə xərçəngdən ölüb. Onu Əl-Rifahi məsçidində dəfn ediblər.
Şahın ölümündən sonra Misir prezidenti şah ailəsinə yaşamaları üçün saray ayırıb. Amma Misir prezidentinin qətlə yetirilməsi səbəbilə Fərəh Pəhləvi və ailəsi bu ölkəni tərk edərək, ABŞ-ın dövlət başçısı Reyqanın dəvəti ilə okeanın o tayına yollanıb.
2001-ci ildə Fərəh Pəhləvinin qızı şahzadə Leyla vəfat edib.
2011-ci ildə ailəyə növbəti bədbəxtlik üz verib. Məhəmməd Rza Pəhləvinin kiçik oğlu Əlirza Pəhləvi özünü güllə ilə vuraraq, intihar edib.
Bu gün şahbanu Fərəh Pəhləvi Parisdə və Vaşinqtonda yaşayır. Böyük oğlu da ailəsi ilə bərabər Vaşinqtondadır. İran mühacirlərinin bir hissəsi onu "şah" adlandırır. Atasının vəfatından sonra Rza Kir Pəhləvi varis kimi bu titulu götürüb. Mühacirətdəki iranlılar Fərəh Pəhləviyə əvvəlki kimi “Şahbanu” deyərək müraciət olunur.
Pəhləvilər ailəsi hazırda İranda "arzuolunmaz ailə" statusunu daşıyır.
Əslən azərbaycanlı olan Fərəh Pəhləvi Novruz bayramı adət-ənənələrinə riayət etməyə çalışır. O elə dünən ABŞ-dakı malikanəsində kiçik Novruz tonqalları yandıraraq, onların üzərində atılmaqla qədim adətlərə sadiqliyini bir daha nümayiş etdirib.
