Qafqaz Müsəlmanları İdarəsinin sədri Şeyxülislam Allahşükür Paşazadənin rəhbərliyi ilə Azərbaycanın din xadimləri və dövlət qurumları rəhbərlərindən ibarət nümayəndə heyətinin ABŞ-ın Solt-Leyk-Siti şəhərinə səfəri davam edir.
QMİ-nin mətbuat xidmətindən Modern.az-a verilən xəbərə görə, QMİ sədrinin rəhbərlik etdiyi heyətin bir sıra görüşləri baş tutub. Belə ki, günorta saatlarında Şeyxülislam Allahşükür Paşazadə “İsa Məsih Sonuncu Günlərin Müqəddəsləri” kilsəsinin ali rəhbəri Rassel Nelson ilə görüşüb. Nelson Şeyxülislam Paşazadəni, eləcə də onu müşayiət edən Bakı Beynəlxalq Multikulturalizm Mərkəzinin icraçı direktoru Rəvan Həsənovu, Dini Qurumlarla İş üzrə Dövlət Komitəsinin sədr müavini Sahib Nağıyevi və Azərbaycanın ABŞ-dakı Səfiri Xəzər İbrahimi salamlayaraq dəvəti qəbul edib ABŞ-a gəldikləri üçün onlara təşəkkür edib. QMİ sədri ev sahiblərinə nümayiş etdirdikləri səmimi qəbula və qonaqpərvərliyə görə təşəkkür edərək kilsə rəhbərliyinə Azərbaycan Prezidenti İlham Əliyevin salamlarını çatdırıb. Səmimi şəraitdə keçən görüşdə tərəflər müxtəlif dinlərin ortaq dəyərlərinin onları bir-birindən fərqləndirən ənənə və xüsusiyyətlərindən daha mühüm olduğunu, “İsa Məsih Sonuncu Günlərin Müqəddəsləri” kilsəsi və Qafqaz Müsəlmanları İdarəsinin apardığı fəaliyyətin bir çox istiqamətdə üst-üstə düşdüyünü məmnuniyyətlə qeyd ediblər. Hər iki tərəf dinlərarası dialoq və əməkdaşlığın tərəfdarı olduğunu vurğulayıblar.
Şeyxülislam Allahşükür Paşazadə Yuta ştatının Xocalı soyqırımını ABŞ ştatları arasında ilk tanıyanlardan biri olduğunu, bundan başqa, Ermənistan tərəfindən Azərbaycan ərazilərində basdırılan və bugünədək insan ölümlərinə səbəb olmağa davam edən yüz minlərlə minaların zərərləşdirilməsində Yuta ştatının ölkəmizə praktiki dəstəyini xatırladaraq buna görə ev sahibi tərəfə bir daha öz təşəkkürlərini ifadə edib və Kilsə rəhbərlərini Azərbaycana dəvət edib.
Görüşün sonunda Nelson Azərbarcan Prezidenti İlham Əliyevə öz salamlarını çatdırmağı QMİ sədrindən xahiş edib və bildirib ki, cari ilin aprel ayında Kilsənin baş qurultayında tədbirə qatılacaq 20 mindən çox nümayəndə Azərbaycan dövləti və onun xalqı üçün dua edəcəklər.
Azərbaycan nümayəndə heyəti öz növbəti görüşünü Yuta Diedre Hendersonla keçirib. Qonaqları səmimi salamlayan xanım Henderson Azərbaycan heyətinin nümunəvi dinlərarası tərkibini xüsusilə qeyd edib və bundan olduqca məmnun olduğunu bildirib. Şeyxülislam Paşazadə əvvəlki görüşlərdə olduğu kimi bu dəfə də Yuta ştatının Xocalı soyqırımını tanıdığına, Qarabağ torpaqları azad olunduqdan sonra orada Ermənistan tərəfindən basdırılan çoxsaylı minaların zərərləşdirilməsində verdiyi dəstəyə görə Yuta ştatına və onun xalqına təşəkkür edib. Xanım Henderson iki ölkə arasında dinlərarası əməkdaşlığın hər iki tərəf üçün faydalı olduğunu, bununla yanaşı iqtisadi, siyasi, habelə təhsil və mədəniyyət sahələrində əlaqələri inkişaf etdirməkdə ABŞ tərəfinin maraqlı olduğunu vurğulayıb.
Gün ərzində Azərbaycan nümayəndə heyəti “İsa Məsih Sonuncu Günlərin Müqəddəsləri” kilsəsi 12 həvariləri Kvorumunun daha iki üzvü – Ronald Raşband və Devid Bednarla görüşüb. Raşband, eləcə də Bednar Azərbaycanla, azərbaycanlılarla bağlı geniş məlumata malik olduqlarını, ölkəmizin 30 il boyu işğal altında qalan əzəli torpaqlarını azad ardıcıl və inamlı mübarizəsindən, işğal illəri boyu xalqımızın, onun mənəvi və mədəni irsinin məruz qaldığı soyqırım haqqında xəbərdar olduqlarını, hər zaman Azərbaycanın haqq mövqeyini dəstəklədiklərini və bundan sonra da dəstəkləyəcəklərini vurğulayıblar.
***
QMi sədri və onu müşayiət edən heyət martın 1-i səhər saatlarında adı çəkilən kilsənin xeyriyyəçilik qurumu – Velfeyr (Xeyriyyəçilik) meydanı ilə tanış olub. Azərbaycanlı qonaqlar onlarca kənd təsərrüfatı, emal, qablaşdırma müəssisəsi, nəqliyyat və ticarət şəbəkəsi, işədüzəltmə və ianə paylama mərkəzlərini əhatə edən və nəhəng istehsalat birliyini xatırladan qurumun fəaliyyəti ilə bağlı geniş məlumat alıblar. Qurum rəhbərinin sözlərinə görə, ötən il dünyanın müxtəlif ölkələrində təqdim olunan ianələrin ümumi həcmi 1 milyard dollar təşkil edib. Eyni zamanda, «Xeyriyyəçilik meydanı» bu il Türkiyədə və Suriyada dağıdıcı zəlzələdən əziyyət çəkənlərə də öz qayğısını əsirgəməyib və yardım aksiyalarını davam etdirib
