97-ci “Oskar” mükafatları 2 mart 2025-ci ildə sahiblərinə təqdim olunacaq. Hansı filmlərin “Oskar” yarışında yer alacağı artıq müzakirə edilməyə başlayıb, hətta kino tənqidçilərinin bu mükafatı ala biləcək konkret namizədləri də var.
Modern.az saytı 2025-ci ildə “Oskar” ala biləcək “Ən yaxşı aktyor” nominasiyasına namizəd göstərilə biləcək filmləri və aktyorları təqdim edir.
Ralf Fayns – “Conclave”
Ralf Fayns, Stenly Tucci və Con Litqoy kimi tanınmış simaların yer aldığı film “Oskar” yarışının güclü namizədlərindən biridir. Filmin baş roldakı aktyoru Fayns öz çıxışı ilə tənqidçilərdən mükəmməl qiymət almağı bacarıb.
Film Roma Papasının ölümünün ardından Vatikanın gizli intriqalarından bəhs edir.
Timoti Şalame - “A Complete Unknown”
Leonardo DiKaprio, Tom Kruz və Bred Pitt kimi simaların davamçısı hesab edilən Timoti Şalame hazırda Hollivudun ən məşhur aktyorlarından biridir. O, 1965-ci ildə elektrogitara ilə performans göstərməyə başlayan və musiqi dünyasını sarsan gənc Bob Dilan haqqında çəkilmiş “A Complete Unknown” filmində baş rolu canlandırır.
Amerikalı aktyor bu filmində uğurlu çıxışına görə ilk "Oskar" mükafatını ala bilər.
Edrien Broudi – “The Brutalist”
Bredi Korbetin rejissorluq etdiyi filmdə Edrien Broudi, Feliçita Cones və Qay Pirs kimi simalar yer alır. Film II Dünya Müharibəsindən sonra "Amerikan yuxusu"nu yaşamaq üçün ABŞ-a köçən memar Laszlonun həyatına fokuslanır.
Onu da qeyd edək ki, aktyor 2003-cü ildə "Pianoçu" filmində canlandırdığı polyak ifaçı obrazına görə “Ən yaxşı aktyor” nominasiyasının qalibi olub.
Kolman Dominqo – “Sing Sing”
Film bir həbsxanada incəsənət vasitəsilə reabilitasiya proqramına qatılan bir qrup məhbusun hekayəsindən bəhs edir. Filmin aktyor heyətində Kolman Dominqo, Pol Reysi, Sean San Cose kimi güclü heyət yer alır. Baş rolu canlandıran Kolman Dominqonun 2025-ci ilin “Ən yaxşı aktyor” nominasiyasının qalibi olacağı istisna edilmir.
Deniel Kreyq – “Queer”
Ceyms Bond rolu ilə yaddaşlarda iz buraxan ingilis aktyoru Deniel Kreyqin yeni filmi Venedik Film Festivalında 9 dəqiqə boyunca ayaq üstə alqışlandı.
Usta rejissor Luka Quadinonun imzasını daşıyan filmin “Oskar” yarışında yüksək yer tutma potensialı güclüdür. Amerikalı miqrant və narkotik aludəçisi olan Lini canlandıran Kreyqin çıxışı, kino tənqidçilərindən mükəmməl qiymət almağı bacarıb.
Paul Meskal – “Gladiator 2”
Rejissor Ridli Skot beş kateqoriyada “Oskar” qazanan və baş rol aktyoru Rassel Krouya “Ən yaxşı aktyor” mükafatını qazandıran məşhur “Gladiator” filmini 24 il sonra yenidən ekrana gətirdi.
Paul Meskal, Pedro Paskal, Denzel Vaşinqton, Bary Keoqan və Cosef Quini kimi simaların yer aldığı “Gladiator 2” 15 noyabrda ölkəmizdə də baxışa çıxarılıb. Film populyarlığını qorumaqla yanaşı, baş rolu ifa edən Paul Meskalın da karyerası üçün dönüş nöqtəsi hesab edilir.
Bu filmin yenidən bir neçə nominasiya üzrə “Oskar” alacağı ilə yanaşı, Paul Meskalın da ilk dəfə “Ən yaxşı aktyor” nominasiyasının qalibi olacağı düşünülür.
Sebastian Stan – “The Apprentice”
Marvel filmlərində “Winter solider” xarakterini canlandıran ABŞ-li aktyor Sebastian Stan bu filmdə Donald Trampı canlandırıb. Filmin rejissorluğunu isə Kan kino festivalı mükafatının qalibi, iranlı rejissor Ali Abbasi edib. Film 1970-1980-ci illərdə Trampın karyerasını incələyir.
“The Apprentice”nin Trampın ikinci dəfə prezident seçilməsi səbəbi ilə ilin ən çox səs gətirən filmlərindən olacağı gözlənilir.
