Son günlərdə ölkəmizdə mədəniyyət sahəsində çalışan yaşlı və gənc nəsillər arasında müəyyən anlaşılmazlıqlar yaşanır.
Belə ki, bu gün Akademik Milli Dram Teatrında Xalq artisti Əli Nurun iştirakı ilə baş verən qalmaqal, eyni zamanda gənc rejissor Əli Ucalın çəkdiyi filmin Əməkdar artist Mirzə Ağabəyli tərəfindən tənqidi səs-küyə səbəb olub.
Ancaq müşahidələr göstərir ki, bu anlaşılmazlıq bir neçə nəfəri yox ümumilikdə teatr və kino sahəsində olanları iki yerə bölüb.
Modern.az mövzu ilə bağlı Xalq artisti, kinorejissoru, ssenarist və aktyor Əbdül Mahmudovla həmsöhbət olub.
“Mən Kino Agentliyindəyəm, (ARKA) bir nəfər material göndərib, 10 saatdır baxırıq, hələ də heç nə başa düşməmişik” – deyə o, söhbətə başlayıb.
“Biz ARKA-da yığılmışıq ki, yavaş-yavaş hər kəsə həddini göstərək, bilsinlər ki, rejissor olmaq, kino çəkmək nədir. Bunların heç birini bilməyib, yerindən duran kino çəkmək istəyir. Hamısı da yalandan telefon alıb əlinə alabaşına-külbaşına nəsə çəkib gəlirlər ki, ARKA bizə pul ver. Deyəndə də inciyib, küsürlər. Bayaqdan 10 saatlıq materiala baxmışam. Biri film göndərib adını da qoyub “Hocaz”. O nə addır, başa düşə bilmirəm. Boş-boş materiallardır, ancaq deyir sağa get, sola get. Mən məcbur olub ARKA-da da, Cənab Prezidentin qarşısında da məsələ qaldıracam ki, artıq bu kimi şeylərə qayda-qanun, reqlament, ölçü-dəyər qoymaq lazımdır. Ondan sonra bilinsin, kim film çəkə bilər, ssenari yaza bilər, hansı aktyor hansı rolda oynaya bilər, filmin məğzi, dramaturgiyası, süjet xətti, hadisələrin harada və necə cərəyan edəcəyi bilinər. Əks halda hamı əlinə bir telefon alıb, nəsə çəkib bizə göndərir ki, film çəkmişəm. Bu ARKA-ya qarşı, burada oturan peşəkarlara qarşı hörmətsizlikdir”.
Şeyx Əbdül bildirib ki, şapalaqla üz qızardan dırnaqarası kinorejissorlar, kino çəkmək adı ilə kino sahəsinə bəla olanlara yerlərin göstərəndə gedib orada-burada demoqoqluq edirlər, arxamızca ünvanımıza sözlər deyirlər:
“Bu gün Azərbaycana təbliğat, ideologiya lazımdır. Biz dünyaya açılmalıyıq. Dünyaya da açılmanın yeganə sərhəddi kinodur. Yerindən də duran Qarabağdan tutur. Birinin materialına imtina gələn kimi, başlayır ağzına gələni yazmağa. Siz də elə olanda birbaşa bizə müraciət edin ki, onları ifşa edək, bilsinlər həmin materiallar nəyə görə bəyənilmir. Hamısı da pul istəyir. Düz 41 ildir Heydər Əliyevin sifarişi ilə “Şah İsmayıl” filminin senarisini yazmışam, 30 ilimi “Ağa Məhəmməd Şah Qacar” filminə qurban vermişəm. Mən pul yoxdur, lazımi təchizat və təminat yoxdur deyə gözləyirəm. Bunlar deyir ki, pul yoxdur film yarımçıq qalır. Onda çəkmə!”.
Xalq artisti kino sahəsinə kadr hazırlayan Azərbaycan Mədəniyyət və İncəsənət Universiteti haqqında da danışıb:
“Gülməli universitet var, adını qoyublar incəsənət. Bütün günü zurna-balaban çalmaqla məşğuldurlar. Oranı bitirmək rejissor, ssenarist olmaq demək deyil. Yüzlərlə gənc xarici universitetlər oxuyub, aspiranturaya qədər dərəcə alır onlardan da bir-ikisi kino çəkə bilir, rejissor olur. Kinonu diplom çəkmir, kinonu peşəkar sənətkar çəkir bunlar birinci sənəti öyrənsinlər ondan sonra deyərlər ki, kino çəkirik buna görə də bizə pul verin. Hər universiteti bitirən qoltuğuna bir ssenarini vurub dayısının, qaynının, bacanağının hesabına deyir ki, mən kino çəkirəm. Birinci onlar kinonun nə olduğunu mənə izah etsin sonra kino çəkər”.
“Əvvəla Mədəniyyət və İncəsənət Universiteti Teatr-kino institutu olmalıdır. Qalan bütün fakültələri bağlansın, atılsın qırağa. Hələ bir görək o universitetin üstümə göndərdiyi tələbələr haradan öyrənib kino sənətin, hansı çəkiliş meydançasına gedib, ona hansı rejissor göstərib ki, kinonu belə çəkmək lazımdır. Praktika, təcrübə keçibmi, bizim üstümüzə göndərməzdən əvvəl özü hansı işi görüb? İşə 5-10 dəqiəlik süjet hazırlamaqla başlayırlar”- deyə sonda Ə. Mahmudov bildirib.
