Tanınmış yazıçı-jurnalist, loğman Ərşad Əzimzadə Azərbaycan Respublikasının Prezidenti İlham əliyevə müraciət edib.
Modern.az-ın məlumatına görə, Ərşad Əzimzadə dövlət başçısından doğulduğu Zəngilan rayonuna qayıtması üçün kömək istəyib:
“Mən 1934-cü ildə Zəngilan rayonunun Seyidlər kəndində anadan olmuşam. Xeyli vaxt regional qəzetin şöbə müdiri işləmişəm. Sonra əmək fəaliyyətimi respublikanın aparıcı qəzetlərində (“Azərbaycan gəncləri”, “Molodyoj Azerbaydjana”, “Bakinskiy raboçiy” və “Azərbaycan”) davam etmişəm. Hazırda təqaüdçüyəm, Xaçmazın Yergüc kəndində tək yaşayıram.
Mən doğma diyarıma qayıtmaq, Sizin başladığınız və uğurla həyata keçirdiyiniz quruculuq işlərində, bir ziyalı kimi, fəal iştirak etmək istəyirəm. Məramım – Xan Çinarlar Vətənini sağlam və uzunömürlü insanlar diyarına çevirməkdir.
Soruşa bilərsiniz: sən, 90 yaşlı qoca nə iş görə bilərsən?
Bəli, yaşım çoxdur. Amma qoca deyiləm. Sinəmdə, böyük quruculuq işləri aparan dövlətə yardımçı olmaq, ağır zərbə almış Vətəninə və dərin sarsıntı keçirmiş Xalqına təmənnasız xidmət etrmək istəyən bir gəncin ürəyi döyünür. Güman edirəm, topladığım bilik və zəngin həyat təcrübəm, eləcə də insanlara nikbin ovqat aşılamaq bacarığım, “sağlam cisim – sağlam ruh” təməli üzərində vətənpərvər nəsil yetişdirmək kimi vacib bir məsələdə faydalı ola bilər.
Tam təmənnasız çalışmağa hazıram. Enerjim də var, yaşamaq və işləmək həvəsim də, aydın zəkam və güclü yaddaşım da. Bunlar haradandı? Mən, 30 yaşdan 60 yaşacan 8 ağır xəstəlikdən əzab çəkən, 30 il dərman-terapiya müalicəsi alan bir insan, 1995-ci ildə dahi yapon alimi Nişinin Sağlamlıq Sistemini həyatıma tətbiq edərək, həm sağlamlığımı, həm də gəncliyimi qaytara bildim. Məhz 60 yaşdan sonra məndə güclü yazıb-yaratmaq və çalışmaq həvəsi oyandı. Son 30 ildə 20-dən çox elmi-publisistik və bədii əsər yazıb, xalqıma təqdim etmişəm. Bestsellerə çevrilmiş “Möcüzəsiz möcüzə” əsərim türk və fars dillərinə tərcümə olunub».
Ə.Əzimzadə bildirib ki, o, yazıçılıq missiyasını Zəngilanda davam etmək istəyir:
“Lakin “qaçqın” statusum və şəxsi ev tikmək imkanım yoxdur. Doğma diyara qayıdış yolumu kəsən yeganə maneə mənzil problemidir. Onu ancaq Siz həll edə bilərsiniz. Bu maneə aradan qalxsa, ömrümün qalan hissəsini insanlara xidmət göstərməyə, Vətənimə dəyən yaranı sağaltmaq prosesində fəal iştirak etməyə hazıram”.
