“Cahangir Novruzov məşhur bir sənətkar ailəsində dünyaya göz açıb. Moskvada ali təhsil alıb. Fəaliyyətinin ilk illərində Şəki teatrında çalışmağa başlayıb. Əvvəlcə aktyor, sonra da rejissor kimi fəaliyyət göstərib. Şəki teatrında Hüseynağa Atakişiyevdən sonra o dəst-xətti deyərdim ki, Cahangir Novruzov davam etdirib. Təəssüf ki, bir neçə il sonra Bakıya qayıtdı”.
Bu fikirləri Modern.az-a tanınmış sənətşünas, jurnalist Seymur Elsevər deputat Səyyad Aranın Türkiyədə yaşayan rejissor Cahangir Novruzovun ölkəmizə dəvət olunması ilə bağlı təklifinə münasibət bildirərkən deyib.
S.Elsevərin sözlərinə görə, Şəki teatrı vaxtilə uğurlu fəaliyyəti olan mədəniyyət müəssisələrindən biri olub:
“Bu teatr 1970-ci illərin sonu 80-ci iilərin əvvəlində uğura imza atmışdı. 1975-ci ildə aktyor kimi fəaliyyətə başlayan Hüseynağa Atakişiyev gənc idi, rejissor Vaqif Abbasov rəhmətə gedəndən sonra Şəki teatrının bütün ağırlığını, yükünü öz üzərinə götürmüşdü. Şəki teatrı o dövrdə nəinki SSRİ-də, Avropada uğur qazanmışdı. Təəssüf ki, biz belə bir nəticəni indi görmürük. Halbuki o dövrdə SSRİ miqyasında tanınmaq Avropada tanınmağa bərabər idi. Burada uğur qazanmaq elə-belə iş deyildi, amma Şəki teatrı bunun öhdəsindən gəlmişdi. Bu gün də mən Azərbaycan teatrında, xüsusilə də bölgələrdə bu səviyyəni görməyi arzulayıram. İnşallah, bizə bunu görmək qismət olacaq”.
S.Elsevər bildirib ki, 1990-cı illər bütün ölkə üçün ağır dövr olub:
“Bizim çox sənətkarlarımız xaricə üz tutdular. O cümlədən Cahangir Novruzov da Türkiyəyə getmək variantını seçdi. Orada dərs dedi və kənarda tamaşalar hazırladı. 30 ilə yaxındır Türkiyədə çalışır. Onun məhsuldar ömrünün çox hissəsi artıq xaricdə fəaliyyətdə keçib. Onu buraya gətirmək mövzusu əvvəllər də bir neçə dəfə gündəmdə olmuşdu. Hətta o vaxt elə fikirlər dolaşırdı ki, Musiqili Teatra direktor yaxud bədii rəhbər kimi gətiriləcək. Amma nədənsə o vaxt həmin məsələ reallaşmadı. İndi də nə qədər realdır, bilmirəm. Eyni zamanda Cahangir Novruzovun özünün də bunu istəməsi məsələsi var. O elə bir sambalda, təcrübədə sənətkardır ki, ona öz gücünü göstərmək üçün yaxşı bir meydan verilməlidir. O, yəqin ki, bölgədə işləmək variantını seçməz, Bakıda da bilmirəm harada ona belə bir şərait yaradılar”.
“Burada məsələnin belə bir suallı tərəfi də var. Səyyad Aran mənim də tanıdığım, hörmət etdiyim qələm adamıdır. Amma məsələnin belə xüsusiyyətlərindən xəbərsizdir, çünki o teatr adamı deyil. Amma burada çox məqamlar var ki, hamısı ödənməlidir. C.Novruzovun razılıq məsələsindən tutmuş ona harada belə bir meydan verilməsi, hansı təkliflə razılaşması məsələləri var. Bunlar məsələnin suallı tərəfləridir. Azərbaycan teatrı batırsa, Cahangir Novruzovun gəlməyi onu xilas etmək demək deyil. Yaxud da Cahangir Novruzovsuz teatr batacaq hökmünü vermək olmaz. Bir adam nə qədər peşəkar da olsa, prosesi bir adamın adı ilə bağlamaq yanlış fikirdir”, - S.Elsevər qeyd edib.
