“Azərbaycan teatrının vəziyyətini qiymətləndirmək məsələsindən danışsaq, birmənalı fikir söyləmək çətindir. Bu xüsusda qısa nəsə demək də imkan daxilində deyil. Teatrımızın həm uğurları, həm də uğursuzluğu var. Bütövlükdə prosesdə çatışan və çatışmayan məsələlər var. Bunlar ətraflı müzakirə tələb edir”.
Bu fikirləri Modern.az-a açıqlamasında sənətşünas, jurnalist Seymur Elsevər son günlər teatra aid müzakirələrə münasibət bildiriərkən deyib.
O, Azərbaycan Dövlət Milli Dram Teatrının bədii rəhbəri Mehriban Ələkbərzadə ilə bir neçə aktrisa (Mehriban Xanlarova, Məsmə Aslan və s.) arasında yaşanan qalmaqala da toxunub:
“Bir nəfər də kənardan oradakı narazı qüvvələri dəstəkləyir. O da narazılar sırasındadır, amma prosesdən xaricdə. Teatr canlı, sinkretik sənət sənət növüdür. Yəni bu, kollektiv əməyin məhsuludur. Sənət adamları emosionaldır, səhnə və ekran adamları həmişə özünü göstərməyə meyilli olub. Bu, onların təbiətindədir. Artist eqoizmi deyilən bir anlayış var. Aktyorların istedadından, potensialından, zəhmətkeşliyindən asılı olmayaraq hamısının içində sözün yaxşı və pis mənasında bir iddia var. Bəziləri düşünür ki, onun imkanları daha genişdir, amma ona bu şəraiti yaratmırlar, həmin aktyorun potensialını realizə etmək üçün münasib tamaşalar qoyulmur, yaxud rol verilmir. Bəzən doğrudan da haqsızlıq ucbatından bu şeylər baş verir, bunu da danmaq olmaz. Tarixdə teatrımızın təşkilatlanması sovet dövründən başlayıb. Ona qədər pərakəndəlik olub. Teatrımızın mükəmməlləşmə mərhələsi məhz sovet dövrünə təsadüf edir. O dövrdən indiyə qədər kollektivin böyük hissəsi bədii rəhbərdən razı qalsa da, narazılar da olub. Bizim xalqımızın özünəməxsus xüsusiyyətlərini nəzərə alanda deyə bilərik ki, heç vaxt razı qalmayacağıq. Bir adam 200 adamı razı salsa da, 1-2 nəfər tapılacaq ki, gileylənsin. Mənim deməyim əsas vermir ki, narazıların fikri dinlənilməməlidir. Amma baxır bu narazılığın səbəbi nədir, nə dərəcədə əsaslıdır. Hər kəsin özünə görə arqumenti var”.
Sənətşünasın sözlərinə gör, bədii rəhbər teatrda həlledici funksiya daşıyır:
“O adamlara bir imkan verilməlidir ki, çalışsınlar, teatrı müəyyən yerə çıxarsınlar. Burada ciddi suallar onunla bağlı ola bilər ki, teatrın hazırkı siması necədir, teatr günün tələblərinə necə cavab verir... Qədim bir sənət ocağı sayılan teatr o tarixi sambalı doğruldurmu?! Dünya ilə ayaqlaşa bilirmi? Belə suallar qoyulsa, daha yaxşı olar. Həm də peşəkarlarla yanaşı, cəmiyyəti də daha doğru məcraya yönəldər. Amma təəssüf ki, Azərbaycan mətbuatında əli qələm tutan bəzi adamlar ucuz maraqlara xidmət edirlər. Şou yaratmağı hədəf seçirlər. Baş verənlər daha çox onun ifadəsi kimi görünür. Yenə deyirəm, proses mədəniyyət nazirinin daimi nəzarətindədir. Bu şeyləri bir az gözləmək lazımdır. Düşünürəm ki, müzakirə olunan məsələ fəsad vermədən sovuşub gedəcək. Mehriban xanım təcrübəli, savadlı sənətkardır. Buna görə də nazirlik onu bədii rəhbər vəzifəsindən kənarlaşdırmayıb. Çünki özlərinin təyin etdiyi insanın əməyini qiymətləndirirlər. Onu o vəzifəyə təyin edəndə gözləntilər də, qarşısına qoyulan vəzifələr də çox idi ki, teatr üçün vacib işlər görsün. Amma bundan ötrü adama vaxt verilməlidir. Yəqin ki, köklü dəyişiklik üçün öz ciddi konsepsiyası var. Bu istiqamətdə də çalışır. Səbrlə gözləməliyik ki, nəticə hara gəlib çıxacaq”.
