Son illər plastik əməliyyatlara maraq yüksək həddə çatıb. Ən çox da gənc nəsilin müraciət etdiyi burun estetikası, dodaq dolğusu və bədənşəkilləndirmə kimi prosedurlar dəb halını alıb. Sosial medianın təsiri, ideal görünüş meyarlarının dəyişməsi, psixoloji komplekslər kimi amillər bu cür əməliyyatları gündəmdən düşməyə qoymur.
Estetik-plastik cərrah Vaqif Qələndərli Modern.az saytına deyib ki, dünyada olduğu kimi, Azərbaycanda da eyni tendensiya hökm sürür.
“Plastik-estetik və rekonstruktiv cərrahiyəyə maraq hər il artmaqdadır. İlk səbəb kimi, əməliyyat prosedurlarının daha müasir hala gəlməsi və əlçatan olmasıdır. Ən çox da gənc xanımlar bu prosedurlara üz tuturlar”.
Müsahibimiz qeyd edib ki, plastik cərrahiyənin 2 növü var: bərpaedici və estetik. Bərpaedici əməliyyatlara rekonstruktiv əməliyyatlar, anadangəlmə qüsur və fiziki travmaların düzəldilməsi, toxumaların yenidən əvvəlki halına qaytarılması, qəza nəticəsində əmələ gələn problemlərin bərpası daxildir. Estetik əməliyyatlara isə üz, boyun, bədən qırışlarının, artıq ətlərinin aradan qaldırılması, doğum zamanı bədəndə yaranan piylənmənin yox edilməsi, bədənin müxtəlif yerlərindən (sinə, qarın, çanaq, ayaqlar, qolaltı) dərinin kəsilməsi və başqaları aiddir.
Vaqif Qələndərli söyləyib ki, ən çox estetik əməliyyat edirənlər arasında 20 yaşdan yuxarı xanımlar üstünlük təşkil edir.
“Onların etdirdiyi əməliyyatlardan rinoplastika (burun əməliyyatı) birinci yerdədir. Daha sonra, blefaroplastika (göz qapağı sallanması) və üz dərisinin (facelifting) dartılması gəlir. Sonra isə süd vəzilərinin kiçildib-böyüdülməsi, piy toxumasının azaldılması (abdominoplastika), qarın divarlarındakı toxumanın aradan qaldırılması əməliyyatları geniş icra olunur”.
Zərif Sofiyeva
