Xəbər verdiyimiz kimi, Fikrət Əmirov adına Gəncə Dövlət Filarmoniyasına yeni direktor təyinatı olub. Bu vəzifəyə Xalq artisti Aygün Səmədzadə Gəncə filarmoniyasının direktoru vəzifəsinə təyin olunub.
Modern.az-ın məlumatına görə, Aygün Səmədzadə təyinatı barədə fikirlərini özünün sosial media hesabında bölüşüb.
"Azərbaycanın ikinci böyük şəhəri, qədim tarixə və yüksək mədəniyyət ənənələrinə malik Gəncəni hər zaman sevmişəm. Bu gün isə mənə böyük etimad göstərildi. Gəncə Dövlət Filarmoniyasının direktoru təyin edildim. Azərbaycanın ən gözəl sənət ocaqlarından biri olan bu məkanın maraqlı layihələrlə, ecazkar səslərlə, nümunəvi konsertlərlə, görüşlərlə daha da parlayacağına inanıram. Məni bu məsuliyyətli və şərəfli vəzifəyə layiq bilənlərin, sənətsevərlərin etimadını doğruldacaq, işgüzar və yaradıcı kollektivimizlə Gəncənin musiqili-mədəni mühitini daha da canlandıracaq, zövqlü dinləyicilərini sevindirəcəyik”, - o qeyd edib.
Aygün Səmədzadə Bülbül adına Orta İxtisas Musiqi Məktəbində fortepiano ixtisası üzrə təhsil alıb. Azərbaycan Dövlət Konservatoriyasının (indiki Bakı Musiqi Akademiyası) Tarix-nəzəriyyə fakültəsində təhsilini davam etdirib. Konservatoriyanı bitirdikdən sonra bu təhsil ocağının Musiqi tarixi kafedrasında müəllim kimi fəaliyyət göstərib.
2003-cü ildə görkəmli Türkiyə bəstəkarı Əhməd Adnan Sayqunun yaradıcılığı ilə bağlı namizədlik (fəlsəfə doktorluğu) dissertasiyasını müdafiə edib.
Aygün Səmədzadə bir çox tanınmış müğənnilərin repertuarında xüsusi yer tutan 200-dən artıq mahnının müəllifidir. O, həmçinin Elçinin "Qatil", "Şekspir", Hüseyn Cavidin "Əmir Teymur", "İblis", İlqar Fəhminin "Mənəm, mən…", Stefan Sveyqin "Yad qadının məktubu" tamaşalarına, eləcə də "Əlavə təsir", "Sirr", "Axırıncı dayanacaq" kimi filmlərə musiqi yazıb.
Yaradıcılığı dövlətimiz tərəfindən yüksək qiymətləndirilən bəstəkar 2011-ci ildə “Əməkdar incəsənət xadimi”, 2018-ci ildə “Xalq artisti” fəxri adlarına layiq görülüb.
Aygün Səmədzadə Milli Məclisin deputatı Ziyad Səmədzadənin qızıdır.
