İslam dininin 5 əsas şərtindən biri namaz qılmaqdır. Namaz üçün isə azan verilməlidir. Bu gün Azərbaycanda hər gün müəyyən saatlarda azan səsləndirilir. Bunun üçün isə məscidlərdə müəzzinlər fəaliyyət göstərir. Müəzzin məscidlərdə azan oxuyan şəxslərdir.

Azan vasitəsilə insanalara həm namaz vaxtının girdiyi, həm də məscidlərdə namaz qılınacağı xatırladılır.

İslam tarixindən də məlumdur ki, ilk azan oxuyan şəxs - ilk müəzzin Bilal Həbəş olub. 

Müşahidələr göstərir ki, müasir çağda heç də bütün məscidlərdə azan canlı olaraq səsləndirilmir.  Bəzən canlı azanı fonoqram əvəzləyir.

Modern.az Azərbaycanda azanların canlı, yoxsa fonoqramla səsləndirildiyini araşdırmağa çalışıb.

Bunun üçün İrəvan Qazılar Şurasının rəhbəri Bəxtiyar Nəcəfovla əlaqə saxladıq.

Din xadimi saytımıza açıqlamasında bildirdi ki, Azərbaycandakı məscidlərdə azan əksər hallarda fonoqramla, bəzi hallarda isə canlı səsləndirilir:

“Azanı canlı versələr yaxşı olardı. Köhnə kişilər minarəyə qalxar, azan verərdilər. Artıq bizdə onu etmirlər. Bu da texnologiyanın inkişafı ilə bağlıdır. Azan canlı olsaydı nə gözəl olardı, amma təəssüf ki, həmişə belə olmur”.

Mikrofonla azan verilməsinin də düzgün olmadığını düşünənlər var. Bəxtiyar Nəcəfov bu məsələyə münasibət bildirdi:

“Mikrofonla azan oxumaqda heç bir problem yoxdur. Mikrofonla da azan vermək olar, niyə olmasın ki...”