Jurnalistika fakültəsinin tələbələri təcrübə zamanı redaksiyalara, eləcə də telekanallara üz tuturlar. Burada isə onlar çox vaxt heç də xoş qarşılanmırlar. Adətən, redaksiyada təcrübəyə gələn tələbələr bu sayaq münasibətlə üzləşirlər: “Gedin ayın sonunda gəlib xasiyyətnamənizi götürərsiniz, ya da ki həftədə bir dəfə gəlsəniz bəsdir”. Bu isə çox vaxt tələbələrin narazılığı ilə qarşılanır.
Modern.az-a açıqlamasında Bakı Dövlət Universitetinin jurnalistika fakültəsinin dekanı Şamil Vəliyev bildirib ki, təcrübə prosesi zamanı tələbələrlə müxtəlif problemlər yaşanır, amma bu problemlər ziddiyyət xarakteri daşımır. “Bu problemləri də asanlıqla aradan qaldırmaq olur. Təcrübə zamanı belə hallar yaşana bilir. Bizdə qrupların hamısında təhkimçi müəllimlər olur, tələbələr və müəllimlər bir yerdə təcrübə yerlərində ayrı-ayrı redaksiyalarda, qəzetlərdə, agentlikdə iştirak edirlər”.
