Jurnalistlər üçün tikilən binanın 3 mərtəbəsi hazırdır - FOTOLAR | Modern.az

Üçüncü mərtəbənin mənzillərinin “oboy”u artıq vurulub, digər mərtəbələrdə iş gedir

Jurnalistlər üçün Bibiheybətdə dövlət  hesabına tikilən evdən yeni xəbər var. Modern.az-ın tikinti yerində olan əməkdaşı görülən işlərlə maraqlanıb. Tikinti üzrə içraçı şəxslər əməkdaşımıza məlumat verməkdən birmənalı olaraq imtina ediblər.

“Rəhbərlik məlumat verməyə icazə vermir. Bura tez-tez jurnalistlər gəlir, heç kimə məlumat vermirik. Siz də digərləri kimi, yalnız çöldən binanın video və foto görüntülərini çəkə bilərsiniz.” – deyə fikirlərini əsaslandırıblar. İçraçı onu da qeyd edib ki, bayramdan sonra və ya işin gedişindən asılı olaraq martda görülən işlər barədə rəsmi açıqlama olacağı gözlənilir. Müxbirimiz bir neçə fəhlədən görülən işlərlə bağlı soruşub. Məlum olub ki,16 mərtəbəli binanın 13-cü mərtəbəsinə qədər mənzillərin divarları ağardılıb, ilk 3 mərtəbədə isə hətta divar kağızları da vurulub. Çöldən isə binanın qara suvaqla üzlənməsi başa çatmaq üzrədir.

2013-cü ildə mətbuat günündə jurnalistlərə təqdim edilməsi nəzərdə tutulan mənzillərin verilməsi barədə kriteriyalar bəlli deyil.Bu barədə KİV-in İnkişafına Dövlət Dəstəyi Fondunun icraçı direktoru Vüqar Səfərli ötən ay mətbuata verdiyi açıqlamada bildirib:” Mənzil almaq üçün tələb olunan kriteriyalar fevral ayında rəsmən elan olunacaq. Ondan sonra sənəd qəbulu başlanacaq. Hələki bu kriteriyalar hazır deyil”

Qeyd edək ki, 2010-cu il iyulun 22-də Prezident İlham Əliyev mətbuat işçilərinin mənzil-məişət şəraitinin yaxşılaşdırılması və onlar üçün yaşayış evlərinin tikilməsi məqsədi ilə KİV-in İnkişafına Dövlət Dəstəyi Fonduna 5 milyon manat vəsait ayırıb. Binada təxminən 150 evsiz jurnalist iki və üçotaqlı təmirli mənzillə təmin olunacaq. 

 

Elçin AĞAYEV