Modern.az

Şəhid anası Jurnalistlər Binasına köçdü

Şəhid anası Jurnalistlər Binasına köçdü

23 İyun 2022, 14:50

Tanınmış jurnalist Şakir Eminbəyli 2017-ci ildə 2-ci Jurnalistlər binasında ona verilən mənzili şəhid ailələrindən birinə bağışlayacağına söz vermişdi. Jurnalist vədini yerinə yetirib.

Mənzilin yeni sahibi – şəhid anası artıq Jurnalistlər binasına köçüb.

Modern.az-ın məlumatına görə, Jurnalistlər binasına yerləşən şəhid anası Vətən müharibəsində həlak olmuş Yusif Budaqovun anası Lətafət Budaqovadır.
 

Şəhid Yusif Ramiq oğlu Budaqov 1997-ci ilin 11 oktyabrında dünyaya gəlib. Ailənin yeganə övladı olub… 2003-2014-ci illərdə Bakı şəhərindəki 132 saylı orta məktəbdə təhsil alıb.

Orta məktəbi bitirdikdən sonra, 2015-2017-ci illərdə hərbi xidmətdə olub, 2016-cı ilin Aprel döyüşlərində iştirak edib. Atası dünyadan erkən köçdüyündən ailənin yükünü daşıyan Yusif Bakı şəhərindəki klinikada işə düzələrək, baş texnik vəzifəsində çalışıb.

Vətən müharibəsi başlayan ərəfədə səfərbərliyə cəlb olunub…

Daha sonra döyüşlərdə iştirak edib…

23 yaşını oktyabrın 11-də müharibədə - səngərdə döyüş yoldaşları ilə birlikdə qeyd edib…

Doğum günündən bir neçə gün sonra Füzuli istiqamətində döyüşlərdən birində həlak olan şəhidin nəşi oktyabrın 30-da anasına, yaxınlarına təhvil verilib. Onu 2020-ci il oktyabrın 31-də də Badamdar qəbiristanlığında dəfn ediblər…

Ölümündən sonra Prezident İlham Əliyevin sərəncamları ilə “Xocavəndin azad olunmasına görə”, “Füzulinin azad olunmasına görə”, "Vətən uğrunda" medalları ilə təltif olunub.

 
Qeyd edək ki, Şəhid anası Lətafət xanım indiyə kimi 1 otaqlı, təmirsiz mənzildə kirayə yaşayırdı.





A.Qorxmaz

Twitter
Sizə yeni tvit var
Keçid et
Hərbi gəmilər döyüşə hazır vəziyyətə gətirildi