Bu gün Globalinfo.az saytının 2 yaşı tamam olub.
Globalinfo.az-ın xüsusi günündə saytın təsisçisi Azər Ayxan Modern.az-ın həmsöhbəti olub.
- Azər bəy, media məkanında 2 ildir mövcud olan Globalinfo.az özünə layiqli yer tapa bilibmi?
- Media elə bir sahədir ki, orada sabit qalmaq mümkün olmur. Yerdəyişmələr baş verir. Xəbərin aktuallığına, eksklüzivliyin çoxluğuna, yanaşma orijinallığına görə tez-tez İP-də dəyişiklik olur. Amma ilk 10-luq, ilk 15-lik, ilk 20-likdə qərarlaşmaq, orda mövqeyini qorumaq heç də asan deyil. Biz qısa müddətdə bunu bacardıq. İllərin saytları ilə yarışmaq, onların arasında yer tutmaq, mövqeyə sahiblənmək asan iş deyil. Bunun üçün kollektiv əmək, orijinal yanaşma, siyasi dünyagörüş, əzm, peşəkarlıq tələb olunur. Globalinfo.az kollektivində sadaladığım keyfiyyətlər olduğundan, koordinasiya yaxşı təşkil edildiyindən, illərlə yığılmış təcrübədən səmərəli istifadə nəticə verdi.
- Bu 2 ili necə xatırlayırsınız?
- Sanki iki gün öncə kimi xatırlayıram. Biz saytı 2022-ci ilin sentyabrından onlayn rejimdə çalışdırmağa başladıq. Amma tələsmədik. Düşündük ki, baza yığaq, kollektivi formalaşdıraq, ofisə köçək, özəl yazılar hazırlayaq, sonra elan edək. Bu da 2 aya yaxın çəkdi. Başımız işə o qədər qarışır, elə ciddi çalışırıq, bəzən günlərin, ayların, illərin necə gəlib keçdiyini fərq etmirik. Şikayətçi deyilik, duaçıyıq...
- Sayt olaraq, qarşınıza qoyduğunuz əsas hədəfləriniz nələrdir?
- Çox oxunmaq, sevilmək. Təbii, pul qazanmaq kimi hədəfimiz də var. Media həm də biznes strukturudur. Reklam bazarından biz də öz payımızı almağa çalışırıq. Amma bundan öncə istərdik ki, reklam bazarı daha yaxşı formalaşsın, ədalətli bölgü olsun. Haqqı çatan saytlar bu bazardan gəlir əldə edib daha da böyüsün. Böyümək, inkişaf etmək, qlobal mediaya çevrilmək əsas hədəfimizdir.
- Hazırda kadr baxımından vəziyyət necədir?
-Yaxşı müxbir tapmaq, ya da onu yetişdirmək mümkündür. Amma yaxşı redaktor tapmaq... Bu məsələ yaralı yerimizdir. Azərbaycan mediasında çox ciddi redaktor defisiti var. Məncə, bu məsələ çox ciddi şəkildə nəzarətə götürülməli, kadrların yetişməsi üçün lazımlı addımlar atılmalıdır.
