Bu gün Azərbaycan mətbuatının və onlayn media məkanının iki önəmli platformasının – “525-ci qəzet”in 32-ci və "Qol.az"ın 16-cı ildönümü qeyd olunur.

 

Modern.az xəbər verir ki, bu iki media orqanı ölkənin informasiya sahəsində özünəməxsus yerə sahibdir və fəaliyyətləri boyunca əhəmiyyətli nailiyyətlər əldə ediblər.

 

“525-ci qəzet” – Peşəkar Jurnalistikanın 32 İli

 

1992-ci ildə təsis olunan “525-ci qəzet”, illər boyu obyektiv və peşəkar jurnalistika prinsiplərinə sadiqliyi ilə seçilmişdir. Qəzetin məqsədi oxuculara həm aktual, həm də analitik məzmun təqdim etmək olub. Bu illər ərzində “525-ci qəzet” Azərbaycanın mətbuat tarixinə imza atan önəmli hadisələrin və proseslərin işıqlandırılmasında aparıcı mövqedə dayanmışdır. Jurnalistikanın müxtəlif janrlarında müvəffəqiyyətlə çıxış edən bu nəşr, həm də gənc jurnalistlərin inkişafında əvəzsiz rol oynayıb.

 

1992-ci il 17 noyabrda ilk dəfə Rəşad Məcidin təsisçiliyi ilə nəşrə başlayan qəzetin adının seçilməsi maraqlı olub. Belə ki, qəzeti öncə “Sabah”, “2x2” adı ilə çap etdirmək istəsələr də, hər iki adda başqa nəşrin qeydiyyatdan keçdiyi məlum olub. Ona görə də rəhbərlik yeni ad fikriləşməli olub. Bu zaman Ədliyyə Nazirliyində qeydiyyatdan keçən 525-ci qəzet olduqlarını öyrənəndə redaktorlar “525-ci qəzet” adını götürməyə qərar veriblər.

 

Müsətqillik dövrü mətbuatının ilk qaranquşlarından olan qəzetin informasiya, siyasət, iqtisadiyyat, mədəniyyət və idman şöbələri fəaliyyət göstərir.

“525-ci qəzet” indi çərşənbə axşamı, çərşənbə, cümə axşamı, cümə, şənbə günləri çıxır.

 

"Qol.az" – Futbol və İdmanın Virtual Platforması

 

Bu gün həm də "Qol.az"ın ad günüdür. 2008-ci ildə yaradılan "Qol.az", Azərbaycanda futbol və digər idman növləri üzrə ən etibarlı və operativ onlayn platformalardan biridir. Sayt, illər ərzində yerli və beynəlxalq idman hadisələrini işıqlandırmaqla yanaşı, oxucularına dəqiq məlumatlar və maraqlı analitik məqalələr təqdim edib. “Qol.az”ın populyarlığının səbəbi yalnız operativ xəbərlər deyil, həm də yüksək keyfiyyətli və balanslı məzmununun təmin olunmasıdır. 16 il ərzində saytın komandası idman jurnalistikasında xüsusi nüfuz qazanıb və bu sahədə etibarlı mənbə kimi tanınıb.

 

 

Bu əlamətdar günlər münasibətilə, hər iki media qurumunu səmimi qəlbdən təbrik edir, onlara uğurlu və məhsuldar gələcək arzulayırıq!