Ən yeni tarixdə medianın tematik diapazonu genişlənərək cəmiyyətlə dövlət qurumlar arası əlaqələrin qurulması, cəmiyyətdə maraqlar toqquşmasından yaranan münaqişələrin transformasiyası, həlli yollarının işıqlandırılması ilə yekunlaşmır.
Media həm də daxili ehtiyacların xarici siyasət və beynəlxalq müstəvilərdə əsaslandırılması ilə lokal və regional təhlükəsizlikdə iştirak edir.
Media dünya siyasətinə təsir göstərən qeyri-hökumət aktoru kimi yerli və milli auditoriya ilə məhdudlaşmır, qlobal səviyyədə təsir aktoru kimi çıxış edir.
Media daxili və xarici ictimaiyyəti məlumatlandırmaq, vətəndaşların manipulyasiyası və beyin yuması , cəmiyyətlərə yad sterotiplərin formalaşdırılması, yad ideologiyanın ixracı, bir sözlə ictimai şüurun dəyişməsi üçün sistemli fəaliyyət göstərməkdədir.
Yenilənən dünyada media kənar maraqların müdafiəçisi, yeni ideologiyaların ixracatçısı kimi geniş kütlələrə həm də yeni, texnoloji diqqət cəlbetmə metodları ilə təsir edir.
Cəmiyyətlərə yeni siyasi ictimai istiqamətlər, inteqrasiyalar və meyllər kimi sırınır.
Bu proses dünyanın bütün yerlərində, regional spesifikalar və fərqliliklər əlavə olunmaqla, eyni ssenari və eyni metod üzərindən həyata keçirilir.
İnternet resurslar artıq informasiya daşıyıcısı olmaqdan çıxıb, ünsiyyət forması, cəmiyyətin mövcudluğu, onun ayrı-ayrı hissələrini birləşdirən zəruri platformaya transformasiya olunub.
Bu platforma bu gün həm də cəmiyyət və dövlət arasında kommunikasiyanın təməlini təşkil edir. Kommunikasiya texnologiyaları və infrastrukturları kimi internet ressurslar artıq cəmiyyətdə özünə məxsus sosial institutlardır.
Bu sosial institutlar ölkədə sosial və mədəni təkaamülün siyasi və təhlükəsizlik aspektlərini qabartmaqla siyasi qərarları təftiş edir, təhlükəli ssenariləri qabartmaqla gərginlik görüntüsü ilə çıxış yolları təqdim edir və s.
Qaçaqmalçı media
24 saat dayanmayan propoqanda ilə “narazı kütlə” formalaşdırılır, aqressiv kütlənin narazı enerjisi yönləndirilir , yad, psevdo bir reallıq formalaşdırılır və s. Son illər ölkədə media institutları və infrastrukturları üçün maliyyə hesabatlılığı ilə bağlı şəffaf fəaliyyət üçün qanunvericilik normaları müəyyənləşib.
Lakin zaman zaman media təsisatlarının fəaliyyət çərçivəsindən kənara çıxan fəaliyyəti haqqında məlumatlar yayılmaqdadır.
Məsələn, Qərb mərkəzlərindən gələn sifarişlər əsasında fəaliyyət, agressiv gündəlik formalaşdırmaq , kənar maraqlara xidmət edən şəxslərin aktivləşməsi xüsusilə diqqət çəkir. Ümumiyyətlə , Azərbaycanda belə şəbəkələrin Qərb ölkələrinin səfirliklərindən təlimatlar alması, bunun müqabilində qrantlara cəlb olunması təcrübəsi mğvcuddur. Burda məqsəd həm də nəticələrə əsasən Azərbaycanda söz azadlığı və demokratiyanın olmamasına dair tezisi dəstəkləyəcək proseslərə rəvac verməkdir.
Zaman-zaman bu şəbəkələr Azərbaycanda yaşayan etnik azadlıqlar üçün milli azadlıq hərəkatına təşviq edən çağrışlar edir. Bu əslində Azərbaycan dövlətin bütövlüyünə, təhlükəsizliyinə hədə olan separatizmə çağırışlardır. Aprel döyüşləri zamanı, 44 günlük müharibə günlərində, Xankəndində antiterror tədbirləri keçiriləndə, Azərbaycan əsgəri təcəvüzkar düşmən ordusunun gülləsinə tuş gələndə belə media təsisatlarda cəmiyyəti çaşdırmağa yönəlik təbliğat yazıları və məlumatları ixrac və tiraj edirdi.
Azərbaycanda bu Qərb agentura şəbəkəsi bəlli strateji gərginlik olan məqamlarda Azərbaycan əleyhinə istinad mənbələri istehsal edir.
Belə media təsisatların əsas məqsədləri cəmiyyət və dövlət monolitliyini zədələmək, milli maraqlar ətrafında xalq-dövlət birliyini sarsıtmağa çalışmaqdır.
Azərbaycanı beynəlxalq müstəvidə gözdən salmağa hesablanmış istinad məqamları və s. hazırlamaqdır.
Yeganə Hacıyeva ,
Mətbuat Şurasının İdarə Heyətinin üzvü .
