Ötən ilin martında Qarabağ Dirçəliş Fondunun mətbuat katibi vəzifəsindən ayrılan Pərvin Məmmədova yenidən əvvəlki vəzifəsinə qaytarılıb.
Modern.az xəbər verir ki, bu barədə onun özü bildirib.
“Bir müddət öncə səhhətimlə əlaqədar olaraq iş yerimdən ayrılmalı olmuşdum. Hazırda yenidən Qarabağ Dirçəliş Fondun Fandreyzinq və kommunikasiya şöbəsinin müdiri vəzifəsində işimin icrasına başlamışam.
Hər bir azərbaycanlı kimi Qarabağın bərpası və dirçəlişi mövzusu mənim üçün də çox əziz, dəyərli və həssasdır. Fondda çalışdığım ilk gündən bu missiya uğrunda canla-başla çalışan komandanın bir hissəsi olmuşam…
...Ümid edirəm ki, bundan sonrakı fəaliyyətim dövründə də jurnalisylərlə əməkdaşlığımız uğurlu olacaq”.
P.Məmmədova 2011-ci ildə peşə fəaliyyətinə Azad Azərbaycan Teleradio Yayım Şirkətində müxbir kimi başlayıb. Daha sonra MTV Azərbaycan televiziyasında aparıcı kimi çalışıb. 2014-2016-cı illərdə Nəqliyyatı İntellektual İdarəetmə Mərkəzinin İctimaiyyətlə əlaqələr şöbəsində baş mütəxəssis, 2016-2018-ci illərdə Nəqliyyat Nazirliyi yanında Dövlət Avtomobil Nəqliyyatı Xidmətinin İctimaiyyətlə əlaqələr şöbəsində aparıcı məsləhətçi vəzifələrində işləyib.
Sonra fəaliyyətini Bakı Beynəlxalq Avtovağzal Kompleksində mətbuat xidmətinin rəhbəri kimi davam etdirib.
Ardınca Odlar Yurdu Universitetinin İnformasiya və ictimaiyyətlə əlaqələr şöbəsinin müdiri vəzifəsində çalışıb.
