Son günlər Rusiya-Azərbaycan münasibətlərində gərginlik müşahidə edilməkdədir. Bu gərginliyin artmasında Rusiya dumasının üzvlərinin, eləcə də media orqanlarının rolu heç də az deyil. Bu gün Azərbaycandakı Rus evi fəaliyyətini dayandırıb. Mətbuatda və sosial şəbəkələrdə Rusiyanın Azərbaycanda fəaliyyət göstərən media qurumlarının da bağlanmasına çağırışlar edilir.
Modern.az-a açıqlamasında Milli Məclisin deputatı Naqif Həmzəyev bildirib ki, Rusiya tərəfi məsuliyyəti öz üzərinə götürüb münasibətləri yumşaltmalı, problemləri həll etməlidir:
“İnanıram ki, Rusiyanın ali rəhbərliyi, rəsmi şəxsləri özlərində cəsarət tapıb bu prosesi ədalətli şəkildə həll edəcəklər. Azərbaycan bugünə qədər iki ölkə arasında münasibətlərin ən yaxşı vəziyyətdə olması, qorunub-saxlanması üçün əlindən gələni edib. Amma beynəlxalq hüquq var. Bununla yanaşı müttəfiqlik münasibətlərimiz var. Buna görə də hesab edirəm ki, Rusiya tərəfi məsuliyyəti öz üzərinə götürərək münasibətləri yumşaltmalı və problemləri həll etməlidir. Burada qeyri-adi nəsə yoxdur, bunu çoxdan etməliydilər. Hansı səbəbdən bu edilmir, biz də tam olaraq anlaya bilmirik. Bununla əlaqədar olaraq Rusiya dumasında təmsil olunan şəxslər və siyasətçilər tərəfindən də xoşagəlməz açıqlamalar verilir, fikirlər irəli sürülür. Bu da onu deməyə əsas verir ki, sanki fürsət gözləyən şəxslər və qruplar vardı ki, prosesi daha da gərginləşdirmək istəyirlər. Eyni zamanda unutmamalıyıq ki, Rusiyanın özündə də Ermənistanın və erməni diasporunun birbaşa nəzarətində olan media qurumları var ki onlar da bu prosesdən sui-istifadə edərək daha da vəziyyəti gərginləşdirmək və Azərbaycan əleyhinə informasiyaları tirajlamaq istəyirlər. Görüldüyü kimi, Azərbaycanın əlində kifayət qədər alətlər var ki, Rusiyaya lazımi adekvat cavablar verilsin. Ancaq biz səbr edərək gözləyirik və ümid edirik ki, proseslər hüquq çərçivəsində öz həllini tapacaq. Lazımi açıqlamalar verilib, addımlar atılaraq vəziyyət yüngüllləşdiriləcək. Ona görə hələlik mən düşünürəm ki, bu alətlər Rusiyanın əlində də var. Hələ növbəti raunda keçilməyib. Biz ümid edirik ki, vəziyyəti bu cür gərginləşdirən şəxslərin, qurumların lazımi cavabı Rusiya rəhbərliyi tərəfindən veriləcək. Azərbaycanın atdığı addımlar hüquq müstəvisindədir və qanun çərçivəsindədir”.
Deputat söyləyib ki, Rusiyada nümayəndəlikləri olan Azərbaycan televiziyalarına, xəbər saytlarına, agentliklərə qarşı təzyiqlər olarsa, Azərbaycandakı Rusiya mediası ilə bağlı da addım atıla bilər:
“44 günlük Vətən müharibəsinin gedişində erməni lobbisinin təsiri ilə Rusiya mediası vasitəsilə Azərbaycana çox böyük təzyiqlər olub. Həmin dövrdən sonra rus mediasına inam o qədər də çox deyil. Bu baxımdan həmin media qurumlarının Azərbaycan ictimaiyyətinə təsir gücü də əvvəlki qədər çox deyil. Bu baxımdan mən düşünürəm ki, hələ media ilə bağlı hansısa addımların atılması gündəmdə deyil. Bir daha qeyd edirəm ki, biz proseslərin necə cərəayan edəcəyini gözləyirik. İnanırıq ki, Rusiya rəsmilərinin bu məsələlərlə bağlı açıqlamaları olacaq. Biz bunu gözləyirik. Belə olan halda, yəni lazımi addımlar atılacağı təqdirdə yumşalmalar olacaq. Buna bənzər hadisələr dəfələrlə olub. Mən inanıram ki, proseslər müsbətə doğru irəliləyəcək. Vəziyyəti gərginləşdirmək, gərgin saxlamaq bizim maraqlarımıza heç də uyğun gəlmir. Amma təbii ki, qarşı tərəfdə bizimlə bərabərhüquqlu müstəvidə çıxış etməlidir. Kimlərinsə, hansısa məmurların, siyasətçilərin şıltaqlığına Rusiya Azərbaycan münasibətlərini qurban verməsinlər”.
