Milli Məclisin İctimai birliklər və dini qurumlar komitəsinin sədri Fazil Mustafa "Jurnalist Araşdırmaları Mərkəzi" İctimai Birliyinin sədri, tanınmış jurnalist Seymur Verdizadəni 50 illik yubileyi münasibətilə təbrik edib.

Modern.az-ın məlumatına görə, komitə sədrinin məktubunda yubilyarın həyat və fəaliyyətinin ən önəmli məqamlarına vurğu edilib:

"Hörmətli Seymur müəllim,
Sizi qarşıdan gələn 50 illik yubileyinizlə bağlı təbrik edir, möhkəm cansağlığı, ictimai və jurnalistlik fəaliyyətinizdə yeni uğurlar arzulayıram!
Çox şadam ki, bu əlamətdar yubileyinizi düşmən işğalından azad edilmiş şəhər və kəndlərimizdə, o cümlədən doğma Cəbrayılda “Böyük Qayıdış” nəticəsində yaşayışın bərpası fonunda keçirirsiniz.
Sizin Qarabağ, ümumən Azərbaycan həqiqətlərinə dair məqalələriniz Türkiyə, Gürcüstan, Ukrayna və d. ölkələrin KİV-lərində yayımlanıb.
2008-ci ildən “Jurnalist Araşdırmaları Mərkəzi” İctimai Birliyinin sədrisiniz. İndiyə kimi QHT-lərə Dövlət Dəstəyi Agentliyinin, Dini Qurumlarla İş üzrə Dövlət Komitəsinin və Mənəvi Dəyərlərin Təbliği Fondunun dəstəyi ilə həyata keçirilən onlarla uğurlu layihənin rəhbəri olmusunuz.
2012-ci ildə “İlin ən yaxşı jurnalisti” seçilmiş, 2012-2018-ci illərdə ölkəmizin aparıcı televiziya kanallarında ekspert kimi fəaliyyət göstərmisiniz. İctimai-siyasi, sosial mövzularla bağlı çıxışlarınız həmişə maraqla qarşılanıb.
Ölkədə bir sıra vətəndaş cəmiyyəti institutlarının formalaşması, inkişafı və onların fəaliyyətinin mediada işıqlandırılması sahəsində önəmli töhfələriniz olub. Bir sözlə, vətəndaş cəmiyyəti institutlarındakı uzunmüddətli, səmərəli fəaliyyətiniz, jurnalist olaraq fəal ictimai mövqeyinizlə seçilirsiniz.
Sizi əlamətdar yubileyiniz münasibətilə bir daha təbrik edir, ən xoş arzularımı yetirirəm!"