Bu gün hakim Yeni Azərbaycan Partiyasının (YAP) mətbu orqanı olan “Yeni Azərbaycan” qəzetinin 32 yaşı tamam olur.
Modern.az-ın məlumatına görə, “Yeni Azərbaycan” qəzetinin 1-ci sayı YAP-ın yaranmasının beşinci ayında – 1993-cü il aprelin 10-da işıq üzü görüb.
"Yeni Azərbaycan" qəzetinin əsas məqsədi ölkədəki sosial, siyasi və iqtisadi proseslər barədə məlumat yaymaq və Yeni Azərbaycan Partiyasının siyasətini geniş kütlələrə çatdırmaqdır.
Qəzet həmçinin dövlətin daxili və xarici siyasətinə dair məqalələr dərc edir.
Qəzetin ilk baş redaktoru YAP-ın qurulmasında iştirak etmiş “91-lər”in üzvü Xeyrəddin Qoca olub. O, 1993-1997-ci illərdə qəzetə rəhbərlik edib.
X.Qoca “Yeni Azərbaycan”ın necə yarandığını belə xatırlayır:
“Naxçıvanda YAP təsis olunanda ümumilli lider Heydər Əliyev mənə İdarə Heyətinin üzvü olmağı təklif etdi. Mən isə bildirdim ki, jurnalist olduğum üçün tez-tez keçiriləcək iclaslarda iştirak edə bilməyəcəyimdən ehtiyat edirəm. Heydər Əliyev də “onda səni Siyasi Şuranın üzvü seçərik…” deyə bildirdi.
Siyasi Şura yığışdı. Orada bəzi məsələlər müzakirə olundu, o cümlədən, partiyanın qəzetinin yaradılmasının vacibliyi Siyasi Şura üzvlərinin nəzərinə çatdırıldı.
Bəziləri dedi ki, gəlin, qəzetin adını “Yeni Azırbaycan” qoyaq, partiyanın adına uyğundur. Mən isə bildirdim ki, “yeni” sözü ilə çıxan qəzetlər çoxdur, bəlkə başqa ad seçək. Heydər Əliyev “qəzetin adının “Proqress” qoyulması necə olar?”,- deyə soruşdu. Hərə bir fikir söylədi, axırda qəzetin “Yeni Azərbaycan” adı ilə çıxarılması qərara alındı. Sonra üzünü mənə tutub dedi: “Xeyrəddin Qoca, mən bilirəm, sən “Səs” qəzetinin redaktoru olmaqdan imtina etmisən ki, partiyanın qəzeti yaradılacaq… Sən olarsan “Yeni Azərbaycan” qəzetinin baş redaktoru...
…1993-cü il martın 26-da Rafael Allahverdiyevlə məni qəzetin yaradılmasına hazırlıqla əlaqədar Naxçıvana çağırdı. Onda Heydər Əliyev artıq, Naxçıvan MR Ali Məclisinin sədri idi. Söhbət zamanı mənə dedi ki, qəzet aprelin 10-da çıxmalıdır.
Dedim ki, belə az vaxtda qəzeti çıxarmaq çətindir. İş otaqları yox, müxbirlər yox, yazılar yox, heç bir avadanlıq yox! Heydər Əliyev dilləndi: “Bürokrat olma, get, qəzeti çıxart!”
İndi mənim təkbaşına işə necə girişdiyimi təsəvvür edin. Əlbəttə, Heydər Əliyev dediyi gün - aprelin 10-da qəzetin ilk nömrəsini çıxardım”.
1997-ci ildə Xeyrəddin Qoca Türkiyə Cümhuriyyətinin İstanbul şəhərində Azərbaycan Respublikasının baş konsulu təyin edildiyindən “Yeni Azərbaycan”ın baş redaktoru vəzifəsindən azad edilib.
1997-ci ildə qəzetə Alqış Musayev baş redaktor təyin edilib. O, 2008-ci ilə qədər qəzetə rəhbərlik edib.
2008-2021-ci illərdə “Yeni Azərbaycan”ın baş redaktoru deputat Hikmət Babaoğlu olub.
2021-ci ildə Alqış Musayev yenidən “Yeni Azərbaycan” qəzetinin baş vəzifəsinə gətirilib və o, hazırda da bu postda çalışır.
A.Qorxmaz
