“Avtosfer.az” saytının baş redaktoru, nəqliyyat məsələləri üzrə ekspert Elməddin Muradlı 2024-cü ildə ali məktəblərə keçirilimiş qəbul imtahanları nəticəsində tələbə adını qazanıb. Maraqlıdır ki, ötən il onun oğlu da ali məktəbə qəbul olunub. Beləcə, ata-bala eyni vaxtda tələbə statusuna yiyələniblər. Bu, Elməddin Muradlının ikinci, oğlu Turqut Muradlının isə ilk tələbəliyidir.

Turqut Muradlı Azərbaycan Dövlət Neft və Sənaye Universitetinin kompüter mühəndisliyi ixtisasına qəbul olunub.

Elməddin Muradlı isə Azərbaycan Texniki Universitetinin logistika və nəqliyyat texnologiyaları ixtisasında təhsil almaq hüququ qazanıb.

Bəs 40 yaşını çoxdan geridə qoyan baş redaktorun təhsil sahəsində işləri necə gedir?

“Keçən semestrdə dərslərimiz dekabr ayında oldu, yanvarda da imtahanlarımızı verdik”.

Bunu Elməddin Muradlı Modern.az-ın əməkdaşı ilə söhbətində deyib.

Onun sözlərinə görə, imtahanlar kamera qarşısında düzgün cavablar tələb edilərək götürülüb:

“4 imtahanın hər birindən "əla" qiymət almışam. İlk imtahanlarım sırf ixtisasla bağlı olduğu üçün çox da çətinlik çəkmədim. İmtahanlardan 3-ü ixtisasdan, 1-i isə ingilis dilindən idi. İngilis dilinə də mənim marağım var, ötən il də bir neçə aylıq kursa getmişdim. Ondan əvvəlki dövrlərdə də kursa getmişəm, orta məktəbdən qalan biliklər də mənə imtahana hazırlaşmaqda kömək etdi. Eyni zamanda müəllimin yaxşı izahı da kömək oldu. Ondan əlavə də evdə orta məktəbdə və universitetdə təhsil alan övladlarım var. Onlar ingilis dilini yaxşı bilir, elə imtahandan əvvəl oğullarımla birlikdə hazırlaşdım. Bir az uşaqların dəstəyi, bir az da öz biliklərimlə yaxşı nəticə göstərdim. Müəllimin bir sözünü heç unutmaram, dedi ki, “oxuyan tələbə dərhal bilinir”. Hər halda belə yadında qalmışamsa, bu çox xoşdur”.

Müsahibimiz bildirib ki, Azərbaycan Texniki Universiteti yaxşı bir ənənənin əsasını qoyub:

“Sonradan tələbələrlə əlaqə saxlayırlar. Hansısa narazılıqları olub-olmadığını, səbəbləri soruşurlar. Məndən də soruşulanda öz fikirlərimi dedim. Müəllimlərimlə də dost olmağa çalışdım. Qasım müəllim, Məmməd müəllim, Nicat müəllim öz işlərinin öhdəsindən layiqincə gəldilər. Dərs prosesində də yaxşı ünsiyyət yaranır. Gündəmdə olan nəqliyyat-logistika məsələləri ilə bağlı müzakirələr aparırıq. Hər bir halda mənim üçün çox xoş oldu ki, belə bir addımı atıb ikinci ali təhsili alıram. Atdığım atdıma görə özümü təqdir edirəm. Nəqliyyat-logistika məsələləri çox aktualdır. Dərs prosesində mənim bilmədiyim məqamlar var ki, bunları da tamamlasam, inşallah dövlətimizə, xalqımıza, ölkəmizə daha böyük faydalar verə biləcəm”.

E.Muradlı Azərbaycan Dövlət Neft və Sənaye Universitetində təhsil alan oğlu Turqutun da işlərinin yaxşı getdiyini, semestr imtahanlarını kəsirsiz verdiyini qeyd edib.