Kıbrıslı jurnalist: Quzey Kıbrısı Azərbaycan və Türkiyə ayaqda saxlayır
“Əbədi Birlik” Gənclər İctimai Birliyinin təşkilatçılığı ilə Ulu Öndər Heydər Əliyevin anadan olmasının 102-ci ildönümünə həsr olunmuş “Əbədi Birliyin Təminatçısı: Ulu Öndər Heydər Əliyev” adlı tədbir keçirilib. Tədbirin aparıcısı Quzey Kıbrıs Türk Cümhuriyyətini təmsil edən tanınmış jurnalist Serdar Şengül olub.
Modern.az xəbər verir ki, tədbirdə Azərbaycan Milli Məclisinin sədr müavini Musa Qasımlı, Demokratiya və İnsan Hüquqları Komitəsinin sədri Çingiz Qənizadə, qazilər, müharibə iştirakçıları, tanınmış siyasətçilər, elm və mədəniyyət xadimləri, həmçinin gənclər iştirak ediblər.
Tədbir Ulu Öndər Heydər Əliyev və Türk dünyasının şəhidlərinin xatirəsinin bir dəqiqəlik sükutla yad edilməsi və Azərbaycan-Türkiyə himnlərinin səsləndirilməsi ilə başlanıb.
Çıxışında Serdar Şengül tədbirdə aparıcı olaraq iştirak etməyin onun üçün böyük qürur və sevinc olduğunu bildirib:
“Ulu Öndər Heydər Əliyev kimi dahi şəxsiyyətin xatirəsinə həsr olunmuş tədbirdə çıxış etmək mənim üçün şərəfdir. Azərbaycanda, xüsusilə də belə bir mötəbər tədbirdə Quzey Kıbrıs Türk Cümhuriyyətindən gəlmiş ilk aparıcı-jurnalist kimi çıxış etmək qürurvericidir.”
O, həmçinin Quzey Kıbrısın beynəlxalq aləmdə tək buraxıldığını, lakin Türkiyə və Azərbaycanın hər zaman arxalarında olduğunu qeyd edib:
“Bugün Quzey Kıbrıs Türk Cümhuriyyətini ayaqda saxlayan iki güclü dövlət – ana vətən Türkiyə və ata vətən Azərbaycan var. Bu bizə həm güvən, həm də güc verir.”
Serdar Şengül Azərbaycana olan sevgisindən də bəhs edib:
“Bundan sonra həyatımı bu gözəl ölkədə – gözəl Azərbaycanda davam etdirəcəyəm, burada işləyəcəyəm və bu qərarımdan dolayı çox xoşbəxtəm.”
Qeyd edək ki, Serdar Şengül 2022-ci ildə azərbaycanlı Ruziyyə Əkbərlə ailə həyatı qurub.
Könül Fətullayeva
