Etibar Cəbrayıloğlu
Babalarımız “Bu günün işini sabaha qoyma” deyib, özündən yaşca balacalara öyüd-nəsihət verəndə elektron media hələ yaranmamışdı. Amma görənlər deyir ki, o zaman adda-budda da olsa qəzetlər çıxırdı. Və çap mediasında çalışan jurnalistlər bəzən özlərini babaların gül kimi sözünü guya eşitməmiş kimi aparırdılar.
Ötən əsrdən qalma qəzetçilərdən biri kimi hərdən mən də bu peşə xəstəliyinə tutuluram. Astagəlliyim, “Filan mövzunu sabah yazsam dünya dağılmaz” prinsipi üzündən bir də ayılıb gördüm ki, Modern.az-ın növbəti ad günündən bir xeyli vaxt keçib.
Elektron mediada xəbərin taleyini dəqiqələr, bəzən də saniyələr həll edir. Belə bir ortamda adından söz etdirmək hər xəbər portalının, saytın, agentliyin hünəri deyil. Modern.az isə hünərli çıxdı. Bəziləri izlə getdilər, bir də gördülər ki, öz izləri qalmayıb, digərləri o qədər hay-küy saldılar, bir də gördülər, olan-qalan səsləri də ortada yoxdu.
Bəziləri xarici ulduzları, yerli yarımulduzları soyundura-soyundura bir də ayılıb gördülər ki, öz abırları da çöldə qalıb. Siması bir yana qalsın, heç adını qorumağı bacarmayanlar da oldu…
Modern.az saytı yerini dəyişsə də, yolunu dəyişmədi. İlk addımları yaxşı yadımdadı, “Montin” tərəfdə, hörmətli Rəşad Məcidin “525-ci qəzet”inin köhnə redaksiyasında birinci mərtəbədəki bir otağa sığınan azsaylı əməkdaşlar uğurlu bir işin təməlini qoyurdular.
Söz vaxtına çəkər, 6 il öncə, sentyabrın əvvəlində, iş günlərinin birində tək məni yox, övladlarım Turanla Fatiməni də müsahibəyə çağırmışdılar. Həmin müsahibədən çəkilən fotoya baxıram, zaman bir göz qırpımında keçib. Turan da, Fatimə də boyda az qala atalarına çatıblar, özüm də 6 il əvvəlki deyiləm, yəqin saçlarım bir az da ağarıb, gərək güzgüyə baxam...
Adam hər gün doğma saydıqlarını axtarır, görüşmək, hal-əhval tutmaq istəyir. Modern.az mənim üçün doğma adam kimidi, hər gün neçə dəfə ondan xəbər tutmaq istəyirəm.
Doğma saydığım üçün Modern.az-ın haqq etdiyi hər uğura sevinirəm. Bu mehriban kollektivdəki qədim və təzə dostlarımın bacarıqlarına bələdəm, bilirəm ki, Modern.az-ın uğurları davamlı olacaq.
Əziz dostlarım, Modern.az-ın ad gününü gec də olsa, təbrik edirəm. Qəzetçiliyə məxsus astagəlliyə görə kiçik günahımdan keçərsiniz yəqin.
Elə bilməyin ki, yadımdan çıxıb, söz “Montin”dəkidi. Bildiniz də nə demək istəyirəm…
