Milli Məclisin 70 saylı Neftçala seçki dairəsindən seçilən deputatı, Vətəndaş Həmrəyliyi Partiyasının sədri Sbir Rüstəmxanlının həyat yoldaşı Tənzilə Rüstəmxanlı Modern.az redaksiyasının qonağı olub.

Müsahibə əsnasında o, siyasi-ictimai həyatından, qadınların siyasi həyatda rolundan, ailə institutundan, eyni zamanda Sabir Rüstəmxanlı ilə münasibətindən danışıb.

Müsahibədən kiçik bir hissə təqdim edirik:

- Gücümü əsas səbəbi də Sabir bəydir. Sabir Rüstəmxanlının xanımı olmaq qolay məsələdir? Yer üzünün ən "çapkın" adamı... (gülür) Sabir bəylə biz evlənəndə atam mənə dedi ki, ay qız sən hara gedirsən, bunun bütün ətrafı qadın doludur. Dedim olsun, o qadınların öhdəsindən mən gələcəm. 

- Öhdələrindən gələ bildinizmi?

- Görməzdən gəldim. Heç görmədim. Sabir Rüstəmxanlı gələn sevgi məktublarını orada-burada gizlədirdi. Getdim arxivindən tapdım. Şairdir də, sevəcək, özü də şöhrətinin zirvəsində olan vaxtlar idi. 30-35 il bundan əvvəli danışıram. Bir gün açdım, gördüm, ilahi, necə gözəl sevgi məktubları var. Lənkərandan bir qız yazmışdı, o məktubu oxuyanda ağladım. Dedim ki, ay Allah, bədii təfəkkürünə bax bunun, bu Sabir bəyi nə gözəl sevir, baxıb o məktublara, qıza yazığım gəldi. Gözəl sevmək lazımdır, indiki gənclər elə sevə bilmir. İndiki sevgiləri əxlaqsızlıq ediblər. O məktubları götürdüm, Qənirə Bəyzadəni çağırdım, dedim sən yaxşı jurnalistsən, həm də alimsən. Gəl bu məktubları toplayaq, buna gözəl bədii don ver, məktubu yazanların adın verməmək şərti ilə kitab kimi çap edək. Sabir bəyin 50 illiyi gəlirdi, o kitabı həmin gün ona hədiyyə verdim. Şoka düşmüşdü, rəng alıb, rəng verirdi. Dedim ki, Sabir bəy, nə vaxta qədər gizlədəcəkdin bunu, sənin yaşanmış həyatın var, bu millət səni sevir, sevgisi olan qadın da olacaqdı. Yazıq deyilmi bu məktublara. O qədər gözəl məktublar idi ki, heyfim gəldi. Sonradan 100 dənə sevgi məktublarına aid kitabları çıxdı. 

Müsahibə yaxın vaxtlarda yayımlanacaq.