Dekabrın 30-da dördüncü çağırış Milli Məclisin payız sessiyasının sonuncu iclası keçirilib. Modern.az xəbər verir ki, iclasda “Dövlət rüsumu haqqında” qanuna və digər bəzi qanunvericilik aktlarına əlavə və dəyişikliklər edilib. İclasın sonunda Milli Məclis Dünya Azərbaycanlılarının Həmrəyliyi Günü münasibətilə müraciət qəbul edib. Ötən illərdən fərqli olaraq bu dəfə müraciəti Milli Məclisin vitse-spikeri Bahar Muradova səsləndirib.
Müraciətdə Azərbaycan xalqına təbriklər çatdırılıb. Qeyd olunub ki, Dünya Azərbaycanlılarının Həmrəyliyi Günü soydaşlarımızın azərbaycançılıq ideyası əsasında birləşməsinin əsasını qoyub: “Bu gün xalqımızın söz, əqidə, əməl birliyinə nail olunması üçün Azərbaycan dövləti tərəfin görülən işlərin miqyası ildən-ilə genişlənir. Dünyanın dörd bir yanına səpələnmiş on milyonlarla azərbaycanlı bu gün birlikdə olmaq həqiqətini daha dərindən dərk edir. Soydaşlarımız arasında bağlar möhkəmlənir, azərbaycanlılar milli hüquqların qoruması işində bir-birinə dayaq dururlar”. Müraciətdə həmçinin, Azərbaycanın böyük inkişaf yolu keçdiyi, Azərbaycanda insan hüquqları və azadlıqlarının etibarlı təmin olunduğu qeyd edilib. O da bildirilib ki, bu ilin noyabrında keçirilən parlament seçkiləri Azərbaycanın demokratik inkişafında yeni mərhələnin başlanğıcı olub. MM-in müraciətində Dağlıq Qarabağ münaqişəsinin nizama salınmasında Azərbaycanın ərazi bütövlüyü prinsipinin əsas götürülməsinin beynəlxalq təşkilatlar və xarici dövlətlər tərəfindən də qəbul olunduğu vurğulanıb: “Azərbaycanın dövlət rəhbərliyinin həyata keçirdiyi siyasət nəticəsində münaqişənin nizama salınmasına nail olacağıq. Bütün azərbaycanlılar səylərini birləşdirməlidir. Bu, problemin həllini daha da yaxınlaşdıra bilərlər”. Bununla yanaşı, müraciətdə xaricdə yaşayan azərbaycanlılar birliyə çağırılıb.
Milli Məclisin spikeri Oqtay Əsədov parlamentin iclasını bağlı elan edəndən sonra Azərbaycan Respublikasının dövlət himni səsləndirilib. Bununla da deputatlar 2011-ci il fevralın 1-dək tətilə çıxıblar. Modern.az
