“ATƏT PA-nın Qarabağ üzrə məruzəçisinin kim olacağı hələlik bilinmir”. Bunu Modern.az saytına açıqlamasında Azərbaycanın ATƏT-in Parlamanet Assambleyasındakı nümayəndə heyətinin üzvü Eldar İbrahimov bildirib. O, qeyd edib ki, əgər yeni şəxs Qoran Lenmarkerdən daha obyektiv olsa, ondan nəsə gözləmək olar:
“Yox, əgər, bu insan da Lenmarkerin yolu ilə getsə, o zaman ondan da müsbət nəsə gözləməyə dəyməz. Açıq deyim, Lenmarker də, ATƏT PA-dakılar da əslində ATƏT-in Minsk qrupunun həmsədri olan ölkələrə, xüsusilə ABŞ-ın ağzına baxırlar. Bu məsələ ATƏT-də, onun Parlament Assambleyasında söz sahibi olan dövlətlərdən daha çox asılıdır. ATƏT, onun Parlament Assambleyası istədiyini etməyə qadir deyil. Elə götürək ATƏT-in Astana sammitini. O bizə nə verdi? Heç nə...Əksinə, Ermənistan prezidenti Dağlıq Qarabağı tanıyacağı ilə bağlı hədyanlarını səsləndirdi. O bunu özbaşına etmir. Demək istəyirəm ki, istər Qarabağ məsələnin müzakirəsi, istərsə də bu problemin danışıqlar yolu ilə həlli çox çətindir. Bəlkə də bu, kənardakılara asan gələ bilər ancaq məsələnin həlli göründüyündən də qat-qat çətindir...”.
“Belə olan halda, bu il Qarabağ məsələsinin həlli danışıqlar müstəvisindən hərbi müstəviyə keçə bilərmi» sualına cavabında E.İbrahimov deyib ki, bu yöndə proqnoz vermək çətindir:
“Hər bir azərbaycanlı torpaqlarımızı işğaldan azad etmək üçün əlinə silah götürməyə hazırdır. Sabah müharibə başlasa, Prezidentimiz, ali baş komandanımız döyüş əmri versə, mən də bu yaşımda silaha sarılıb torpaqlarımızın azad edilməsində vuruşmağı, ölməyi özümə şərəf bilərəm. Təki torpaqlarımız azad olunsun. Biz torpaqlarımızı nəyin bahasına olursa-olsun azad etməliyik. 2011-ci ildə də çalışacağıq ki, bu məsələ sülh yolu ilə həll olunsun. Bu, mümkün olmasa, biz daha nə qədər gözləməliyik? Artıq hamımızın səbri tükənib. Ona görə bu durumda müharibə variantı qaçılmazdır. Biz geci-tezi toprpaqlarımızı geri qaytarmalıyıq, buna beynəlxalq hüquq normaları da tam imkan verir».
Modeern.az
