Vyanada keçirilən ATƏT-in Parlament Assambleyasının (ATƏT PA) X qış sessiyasında ATƏT məkanında immiqrasiya, inteqrasiya və multietnik dialoq mövzusunda keçirilmiş xüsusi debatlarda Azərbaycan nümayəndə heyətinin üzvləri çıxış edib, diqqəti Azərbaycanın bu sahədə üzləşdiyi problemlərə yönəldiblər.
Multietnik Qafqaz regionunda monoetnik dövlət yaradan və irqçi siyasət aparan Ermənistanın bölgə üçün ciddi təhlükə olduğunu bildirən deputat Azay Quliyev deyib ki, bu ölkə nəinki öz ərazisindən etnik qrupları çıxarıb, hətta işğal etdiyi Azərbaycan ərazilərində genişmiqyaslı etnik təmizləmə siyasəti həyata keçirib. ”Biz burada etnik qruplararası dialoqdan danışarkən Azərbaycandakı sadə insanlar – Ermənistandan qovulmuş və Azərbaycanın işğal olunmuş ərazilərindən didərgin düşmüş köçkünlər öz evlərinə geri dönmək, ədalətin bərqərar olması barədə düşünürlər. Unutmaq olmaz ki, monoetniklik və irqçilik Avropa üçün ciddi təhlükə mənbəyidir”.
Deputat ümidvar olduğunu bildirib ki, bu məsələ ilə bağlı ATƏT məruzəçisi Ermənistanın Azərbaycana qarşı etnik təmizləmə siyasəti və buradan irəli gələn problemləri həmin sənəddə əks etdirəcək. Aralıq dənizi hövzəsindəki ölkələrdə yaranmış yeni vəziyyət, ATƏT məkanındakı digər məsələlərin müzakirəsi ilə qış sessiyası öz işinə yekun vurub. Modern.az
