Milli Məclisin Gənclər və idman komitəsinin sədri Fuad Muradov, Hüquq siyasəti və dövlət quruculuğu komitəsinin sədr müavini Rövşən Rzayev AVRONEST Parlament Assambleyasının Büro və prosedur qaydaları üzrə işçi qrupunun iclaslarında iştirak etmək üçün noyabrın 20-dən 24-dək Fransanın Strasburq şəhərində səfərdə olacaqlar.
Bu barədə Modern.az-a Milli Məclisin mətbuat xidmətindən məlumat verilib.
Toplantılarda cari ildə Belarusda və Gürcüstanda keçirilmiş parlament, Moldovada prezident seçkilərinin nəticələri müzakirə ediləcək, qurumun gələcəkdə qəbul edəcəyi qətnamələr barədə fikir mübadiləsi aparılacaq, növbəti tədbirlərin keçiriləcəyi ölkələr və tarixlər müəyyən olunacaq.
Milli Məclisin Ailə, qadın və uşaq məsələləri komitəsinin sədri Aqiyə Naxçıvanlı “Qadın siyasətçilər” mövzusunda keçiriləcək tədbirdə iştirak etmək üçün noyabrın 20-dən 26-dək Almaniyada səfərdə olacaq.
Berlin şəhərində keçiriləcək toplantıda deputatımız “Azərbaycanda qadın hüquqları, ailədə və siyasətdə onların rolu” mövzusunda məruzə edəcək, qanunvericilikdə gender bərabərliyinin təmin olunmasından söhbət açacaq.
Ağa AKİFOĞLU
