Əməkdar jurnalist Hikmət Xudiyevin (Cəmilzadə) İstanbul Universitetinin professoru, dünya şöhrətli plastik cərrah, görkəmli elm adamı, tarixi - etnoqrafik araşdırmalar müəllifi İbrahim Yıldırımın səksən illik yubileyi münasibəti növbəti kitabı işıq üzü görüb.
"Doktor İbrahim Yıldırım" adlı kitabda müəllif soy-kökü Qazax rayonuna bağlı olan professor İbrahim Yıldırımın ulularının XIX əsrin sonlarında çar imperiyasının milli azlıqlara verdiyi zülmdən - məşəqqətli bir həyatdan can qurtarmaq üçün yüzlərlə, minlərlə soydaşımız ata-baba yurdlarını tərk etmək məcburiyyətində qalmalarından, Türkiyənin Amasya vilayətində məskunlaşmalarından tarixi faktlar əsasında məlumat verir. Kitabda 1936-cı il noyabrın 20-də Türkiyədə - Amasya vilayətinin 7 rayonundan biri olan Merzifonda doğulmuş İbrahim Yıldırımın uşaqlıq illəri, ibtidai və orta təhsil alması, Azərbaycan əsilli - Molla Vəli Vidadinin və Molla Pənah Vaqifin nəticəsi olan Fiqən xanımla ailə qurması, İstanbul Universitetinin tibb fakültəsində təhsil illəri, həmçinin elmin zirvələrini fəth edərək Avropanın aparıcı ali təhsil və tibb müəssisələrində ixtisasını artırması, cərrah kimi fəaliyyət göstərməsi və nəhayət İstanbul Universitetinin Cərrahpaşa tibb fakültəsində həkimlik fəaliyyəti haqqında ətraflı məlumat verilir.
Kitabda müstəqilliyimizin ilk illərində Qarabağ savaşında yaralanmış döyüşçülərimizin müalicə olunmasında, ölkəmizə dərman ləvazimatlarının gətirilməsində, ağır yaralıların xarici ölkələrdə müalicə almasında, ölkəmizin səhiyyəsinin inkşafı, xüsusən də tibb kadrlarının hazırlanması məqsədi ilə azərbaycanlıların Türkiyənin ali təhsil ocaqlarında təhsil alması üçün gənc həkimlərimizə professor İbrahim Yıldırımın xidmətlərindən geniş bəhs olunur.
"Doktor İbrahim Yıldırım" kitabında dünya şöhrətli cərrahın gərgin elmi axtarışları sayəsində neçə-neçə parlaq zəkalı Azərbaycan əsilli soydaşlarımızın Türkiyədəki fəaliyyətinin araşdırılmasından, "Azərbaycandan Amasyaya daşınan türk kültürü və şirvanlılar", «Baş üstündə bir kitabın olması», "Türkiyədə Azərbaycan kültürü", "İstanbul Universitetini bitirmiş azərbaycanlılar", “Amasya araşdırmaları” və s. əsərləri yazaraq orta əsrlərdən üzü bəri Türkiyəyə köç etmiş yurddaşlarımızla bağlı sanballı kitablarından geniş söhbət açılır.
Modern.az
