Azərbaycanda kütləvi aksiyaların keçirilməsinə rəsmi icazənin verilməməsini sərbəst toplaşma azadlığının təmin edilməsinə əngəl hesab edən müxalifət iqtidarı həm də insan hüquqlarını pozmaqda ittiham edir. Müxalifyönlü qurumlar son vaxtlar gənclərin və siyasi qüvvələrin aksiyalarının polis tərəfindən dağıdılmasının yolverilməz olduğunu bildirilər. Partiyalar hakimiyyəti sərbəst toplaşma üçün şərait yaratmağa çağırırlar. Elə bəzi beynəlxalq təşkilatlar da kütləvi aksiyalara icazə verilməməsini Azərbaycanda insan hüquqularının pozulması kimi qiymətləndirirlər. Milli Məclisin İnsan hüquqları komitəsinin üzvü Aytən Mustafayeva Modern.az saytına açıqlamasında bildirib ki, o, beynəlxalq təşkilatların mövqeyini bölüşmür. Deputat deyib ki, beynəlxalq təşkilatlarn nə yazmasından asılı olmayaraq hər bir dövlətin özünün təhlükəsizlik məsələləri var. “Kim təminat verə bilər ki, gənclərin keçirəcəkləri hər hansı etiraz aksiyasında təxribat törədilməyəcək. Azərbaycanda təxribat törətməkdə maraqlı qüvvələr var”-deyə A.Mustafayeva məsələyə bu prizmadan yanaşaraq kütləvi aksiyalara icazə verilməməsini insan hüquqlarının pozulması kimi qiymətləndirmir. Modern.az
