Modern.az saytı xəbər verir ki, QHT-lərə Dövlət Dəstəyi şurasının sədri, millət vəkili Azay Quliyev Milli Məclisin bu günkü iclasında Rusiyada işləyən Azərbaycan vətəndaşlarının əmək pensiyası ilə bağlı məsələ qaldırıb.
O qeyd edib ki, bu sahədə Azərbaycanla Rusiya arasında bir sənəd imzalanıb.
“Tutaq ki, Azərbaycan vətəndaşı gedib Rusiyada 5-6 il işləyirsə, onun əmək kitabçasında yazılır ki, bu orada işləyib. Qayıdanda Rusiya tərəfindən həmin müddət təsdiqlənmir deyə, bu, şəxsin əmək stajı hesab olunmur və onun pensiya məsələsində ciddi problemlər yaradır. Bu məsələləri ardan qaldırmalıyıq”-deyə deputat qeyd edib.
Daha sonra çıxış edən millət vəkili Qənirə Paşayeva da Azay Quliyevin qaldırdığı məsələyə dəstək olduğunu bildirib: “Azərbaycandan Rusiyaya çörək qazanmağa gedən kifayət qədər insan var. Bu baxımdan məsələ həllini tapmalıdır. Azay Quliyevin qaldırdığı məsələ çox ciddidir və dəstək tapmasa, xeyli insan əmək pensiyası ilə bağlı çətinliklərlə üzləşəcək”.
Modern.az
