Bir neçə gün öncə bəzi media orqanlarında “Diaspor rəhbəri dələduz çıxdı” başlıqlı yazı dərc edilib. Yazıda Almaniyada yaşayan Dünya Azərbaycanlıları Assambleyasının (DAA) sədri Rəşad Quliyevdən bəhs olunub. İddia olunub ki, o, Almaniyada sığınacaq almaq istəyən azərbaycanlıları kömək vəd edərək aldadıb, onlardan pul alıb, vədinə isə əməl etməyib.
Rəşad Quliyev məsələ ilə əlaqədar Modern.az-a açıqlama verərək, ittihamları təkzib edib.
O bildirib ki, bu xəbərlər tamamilə qərəzli şəkildə yayılır. Rəşad Quliyev deyib ki, bir neçə gün öncə Azərbaycan Respublikasnın Berlindəki səfirliyinin qarşısında ölkəmizə qarşı təşkil edilmiş aksiyaya etirazını bildirib və ona qarşı hücumlar da həmin piketin təşkilatçılarından qaynaqlanıb.
Rəşad Quliyevin açıqlaması Modern.az-da dəc olunandan sonra qarşı tərəf onun haqqqında yeni ittihamlarla çıxış edib.
Axar.az-ın yazdığına görə, Rəşad Quliyev Bakı şəhər sakini Baba Asəf oğlu Güləhmədovu da aldadaraq, 4 min manat vəsaitini ələ keçirib.
Rəşad Quliyevlə bir sinifdə oxuduğunu bildirən B.Güləhmədovun adı çəkilən sayta dediyinə görə, onu Avropaya aparmaq adı ilə aldadıb:
“Rəşadla Suraxanı rayon Qaraçuxur qəsəbəsində yerləşən Xarici Dillər Təmayüllü Gimnaziyada bir sinifdə oxumuşuq. Əvvəllər münasibətimiz vardı, arada görüşürdük. Onunla 2016-cı ilin yayında əlaqə saxladım, Almaniyaya getmək istədiyimi dedim. Rəşad mənə kömək edəcəyini, hətta başqaları üçün gördüyü işi mənə daha ucuz qiymətə edəcəyini bildirdi.
Rəşad dedi ki, həyat yoldaşım və iki övladımla bərabər Almaniyaya getməyim üçün 7-8 min manat lazım olacaq.
Ancaq məndə o qədər pul yox idi. Yoldaşımın gətirdiyi bütün cehizləri, qızılları dəyər-dəyməzinə satdım. Bu işin alınması üçün qohumlar bankdan 4 min manat kredit götürüb mənə verdilər”.
Baba Güləhmədov bildirib ki, Rəşad Quliyev ona əvvəlcədən 4 min manat verməsini istəyib:
“Dedi ki, Almaniyaya gedəndən sonra daha 4 min verəcəyəm. 4 mini hazırlayandan sonra zəng etdim, bildirdi ki, pulu AB Tour turizm şirkətinin əməkdaşı Nərminə Dadaşovaya verim. Nərminə Dadaşovanı o zaman tanıdım. Pulu ona verdim, o da 4 mini Rəşadın anası Dünyaxanım Məhərrəmovaya çatdırdı”.
Zərərçəkənin sözlərinə görə, Rəşad Quliyev bir müddətdən sonra əlavə 4 min manat da tələb edib:
“Bir müddət sonra Rəşad mənə zəng etdi ki, əlavə 4 min manat da verməlisən. Buna etiraz etdim. Bildirdim ki, əvvəla pulum yoxdur, çünki özümün sənədlərimin hazırlanması, yol xərcim də var. İkincisi isə şərtimiz belə olmayıb. O isə işin alınması üçün Almaniyada bir adama 4 min manat verməli olduğunu bildirdi.
Bizə bilet və xərclik üçün əlavə 4 min manat da lazım idi. Ona dedim ki, sən əvvəl bizimlə elə danışmamışdın, artıq bu iş 12 min manata başa gəlir. Dedi ki, yox, sən məni səhv başa düşmüsən, mənim özümə 8 min manat verməli idin”.
B.Güləhmədov deyir ki, bu danışıqdan sonra keçmiş sinif yoldaşının onu aldatdığını anlayıb:
“Artıq onun dələduzluq etdiyini gördüm. Rəşaddan pulumu geri tələb elədim. Ancaq o aldığı pulu verməkdən imtina etdi. Aylardır ki, pulumu geri qaytarmır”.
B.Güləhmədovun qayınanası, Cəlilabad rayon Göytəpə kənd sakini Şahsənəm Əşrəf qızı Ağayeva isə bildirdi ki, 4 min manatı bankdan öz adına kredit götürüb kürəkəninə verib:
“Dedilər, Baba Almaniyada işləyəcək, pul göndərəcək, mən də krediti ödəyəcəyəm. Ancaq Rəşad kürəkənimi aldatdı, indi həmin krediti pensiyamla ödəyirəm”.
Bundan əvvəl Rəşad Quliyevin Oğuz rayon sakini Əliyev İntiqam Həsən oğlundan dələduzluq yolu ilə 12 min avro (13.550 dollar) vəsait aldığı barədə məlumat verilmişdi. Məsələ ilə bağlı artıq zərərçəkən Daxili İşlər Nazirliyinin Mütəşəkkil Cinayətkarlıqla Mübarizə Baş İdarəsinə şikayət ərizəsi ilə müraciət edib.
