Suriyada 2016-cı ildə rekord sayda uşaq həlak olub. Modern.az xəbər verir ki, BMT-nin Uşaq Fondunun (YUNİSEF) verdiyi məlumata görə, 2016-cı ildə ölkədə 652 uşaq həlak olub. Bu 2014-cü ildən bəri rekord göstəricidir.
2015-ci illə müqayisədə Suriyada həlak olanların sayı 20% artıb.
YUNİSEF-in hesabatlarında 255 uşağın məktəb və məktəbətrafı ərazilərdə öldürüldüyü bildirilir. Həmçinin, hərbi əməliyyatlara cəlb edilən uşaqların sayı 850-ni keçib. Təşkilatın hesabatına görə, azyaşlılar təmas xəttində döyüşlərdə, edamlarda və kamikadze hücumlarında iştirak edir.
“Milyonlarla suriyalı hər gün hücumlara məruz qalır. Onların həyatı alt-üst olub” – deyə YUNİSEF-in Yaxın Şərq və Şimali Afrika regional direktoru Gert Kappilare deyib.
Təşkilatın məlumatına görə, Suriyanın dağlıq regionlarında 2,8 milyon uşaq köməksiz vəziyyətdə qalıb.
Vüqar İSMAYILOV
