9-11 aprel 2011-ci il tarixdə “NUR” Uşaq və Gənclərin İctimai Birliyi, MTV Staying Alive Fondu və Azərbaycan Gənclərinin AİDS-lə Mübarizə Koalisiyası “Uşaqların Göy Qurşağı: HİV/AİDS Maarifləndirməsi paytaxtdan regionlara” adlı Həmyaşıddan-həmyaşıda Təhsil layihəsi çərçivəsində HİV/AİDS Maarifləndirməsi mövzusunda növbəti təlimi təşkil edəcək.
“NUR” UGİB-in sədr müavini Fidan Kərimlinin verdiyi məlumata görə, təlimin keçirilməsində başlıca məqsəd gənclərə sağlam həyat tərzini aşılamaq və HİV/AİDS barədə məlumatlılıq səviyyəsini artırmaqdır.
Təlimdə 14-20 yaşlı 30 gənc iştirak edəcək. Təlimdə fərqlənən iştirakçılar Diplomla təltif olunacaq və 2011-cu ilin may ayında keçirilməsi nəzərdə tutulan Azərbaycanın Regionlarına Avtobus Turunda iştirak hüququ qazanacaqlar. Təlimin açılış mərasimi 9 aprel 2011-ci il tarixdə saat 10.30-da “İrşad” hotelində keçiriləcək.
Qeyd edək ki, “NUR” UGİB HİV/AİDS-in önlənməsi sahəsində fövqəladə xidmətlərinə görə MTV Staying Alive Fondu tərəfindən 2008 və 2009-cu illərdə “STAYING ALIVE AWARD” mükafatı ilə təltif olunub. 2009-cu ildən etibarən MTV Staying Alive Fondunun dəstəyi ilə həyata keçirilən “Uşaqların Göy Qurşağı: HİV/AİDS Maarifləndirməsi paytaxtdan regionlara” adlı Həmyaşıddan-həmyaşıda Təhsil layihəsi 2012-ci ilə qədər davam edəcək.
BMT-nin Baş Assambleyasının Uşaqlara dair Xüsusi Sessiyasının Yekun sənədində 15-24 yaşlı gənclərin ən azı 95%-ni həmyaşıddan-həmyaşıda təhsil, HİV/AİDS, HİV infeksiyasına qarşı həssaslığı azaltmaq üçün yaşam bacarıqlarına dair informasiya ilə təmin etmək məqsəd olaraq təsbit olunub.
Mail Ağaxanov
