Cəbrayıl rayonunun işğaldan azad edilmiş Cocuq Mərcanlı kəndinə Təhsil Nazirliyinin təşkilatçılığı ilə səfər təşkil edilib.
Modern.az xəbər verir ki, səfərdə əcnəbi tələbələr və digər nünamayəndələrlə yanaşı Cocuq Mərcanlıda ilk şəhid olan Faiq Rzayevin anası Ruxsarə Məmmədova da olub.
Şəhidin anası 24 ildən sonra Cocuq Mərcanlıya gələrək təəssüratlarını belə bölüşüb.
“Oğlum Faiq Rzayev 24 il bundan əvvəl Cocuq Mərcanlıda şəhid olub. İlk dəfə oğlum şəhid olmamışdan bir həftə əvvəl Cocuq Mərcanlı kəndində olmuşam. İkinci dəfə 24 ildən sonra ilk dəfə bura gəlirəm. Əlbəttə, 24 ildən sonra oğlumun şəhid olduğu torpağa gələndə özümü çox qəribə hiss elədim. Çox istəyərdim ki, Cocuq Mərcanlıda oğlumun adının əbədiləşdirilməsi həyata keçirilsin. Oğlumla yanaşı, digər şəhidlərin də adına Cocuq Mərcanlıda bir abidə qoyulsun. Biz valideynlər də bura gələndə həmin abidəyə baxaraq təsəlli tapaq”
24 il bundan əvvəl Cocuq Mərcanlıda döyüşən keçmiş döyüşçü Mənsur Məmmədov Modern.az-a açıqlamasında 24 il sonra bura gələndə fərqli əhval-ruhiyyədə olduğunu deyib.
“1994-cü ildə Cocuq Mərcanlıda döyüşmüşəm. 24 ildən sonra bura gələndə özümü tamam fərqli əhval-ruhiyyədə hiss elədim. Hazırda tikinti işləri aparılır. Arzu edirəm ki, digər ərazilərimiz də Cocuq Mərcanlı kimi işğaldan azad edilsin və tikinti-bərpa işləri həyata keçirilsin. Keçmiş döyüşçü olaraq burada aparılan işlərdən qürur hissi duyuruq”
Cocuq Mərcanlıda vuruşan digər döyüşçü Faiq Hüseynov bu yerlərin azad edilməsinin hər kəsdə ruh yüksəkliyini daha da artırdığını bildirib.
“Cocuq Mərcanlı kəndi ilk dəfə 1994-cü ildə azad edilib. Həmin vaxt burada döyüşmüşük və əlil olmuşam. Rəhmətli Faiq Rzayev hazırda dayandığımız yerdə ermənilərin qəfil hücumu zamanı şəhid olub. O, bu kəndin ilk şəhididir. 1994-cü ildə Cocuq Mərcanlı kəndini yenicə azad etmişdik ki, ermənilər ərazini yenidən atəşə tutmuşdular. Faiq Rzayevlə bağlı onu deyə bilərəm ki, mən də keçmiş döyüşçü olaraq onun və Cocuq Mərcanlıda vuruşan digər şəhidlərin adının əbədiləşdirilməsini istəyirik. Bu çox gözəl təşəbbüsdür. Onlar bu kəndin uğrunda şəhid olublar. Biz də onların adına abidə ucaldılmasını istəyirik.
Namidə Bingöl
