Futzal üzrə AÇ-2018-in seçmə mərhələsinin B qrupunda mübarizəyə start verilib. Yığmamız ilk rəqibi olan Bosniya və Herseqovina millisini 5-4 hesabıyla məğlub edib. Milli komandanın qapıçısı Rövşən Hüseynli oyun barəsində fikirlərini Modern.az saytı ilə bölüşüb: “Həmişə ilk oyunlar atmosfer baxımından, oyuna öyrəşmək eyni zamanda psixoloji hazırlıq baxımından çətin olur. Bu gün də ilk oyun olduğuna görə komandamızda bu vəziyyət müəyyən qədər hiss olunurdu. Rəqibi oyundan əvvəl analiz etmişdik. Belə düşünürəm ki, birinci bizim hesabda irəli keçməyimiz bir az arxayınçılıq yaratdı. Sonradan gücümüzü toplayıb hesabı öz xeyrimizə dəyişə bildik. Əsas odu qalib gəldik”.
Rəqibin bir neçə təhlükəli zərbələrini dəf edərək komandasına qalibiyyət qazandıran gənc qapıçı son saniyələrdə buraxdığı qol səhvini belə izah etdi: “Həmin epizodda futbol termini ilə desəm üç “rikoşet” oldu. Top əvvəl Vassouraya sonra Vitaliyə sonra mənə toxunaraq qol oldu. Yəni futbolda belə hallar çox olur. Bunu da təbii qarşılamaq lazımdır. Çünkü futbolda daim stabil oynamaq mümkün deyil. Cətin oyunlar da olur nisbətən rahat oyunlar da”.
Sonda Rövşən Hüseynli komandasının növbəti oyunlara hazırlığı barədə də fikirlərini bildirdi:
“Məqsədimiz maksimum nəticə ilə qrupda birinciliyi qazanmaqdır. Bu gün oyunda ola bilər ki, müdafiədə müəyyən qədər boşluqlar var idi. Əsas odur qalib gələ bildik. Növbəti oyunlarda bu səhvlərimizi aradan qaldırmağa çalışacağıq”.
Aida İSAQ
