Bu gün Yeni Azərbaycan Partiyasının rəsmi orqanı olan “Yeni Azərbaycan” qəzetinin fəaliyyətə başladığı tarixdir. Qəzet 1993-cü il aprelin 10-da işə başlayıb. İlk vaxtlarda qəzetin baş redaktoru Xeyrəddin Qoca olsa da, sonradan bu işi sabiq deputat Alqış Musayev aparıb. 2008-ci ildən isə “Yeni Azərbaycan” qəzetinin baş redaktoru Hikmət Babaoğludur.
Hikmət Babaoğlu “Yeni Azərbaycan” qəzetinin yaranması ilə bağlı təəssüratlarını Modern.az-la bölüşüb.
““Yeni Azərbaycan” qəzeti müstəqil mətbuatımızın yeni formalaşdığı illərdə-1993-cü ildə işıq üzü görüb və media həyatına ideoloji qəzet kimi başlayıb. Əlbəttə ki, ötən illər ərzində ölkəmizin ən məşhur və sevilən ictimai-siyasi qəzetlərindən birinə çevrilib. “Yeni Azərbaycan” qəzeti fəaliyyət göstərdiyi illər ərzində ölkəmizdəki ictimai rəyin düzgün əsaslarda formalaşması üçün xeyli dərəcədə xidmət göstərmiş qəzetdir. Eyni zamanda, milli mətbu orqanlarımız içərisində obyektivliyi və milli-mənəvi dəyərlərimizin geniş təbliğ etməsi ilə seçilən, dünyada baş verən hadisələri analitik təfəkkürün süzgəcindən keçirib Azərbaycan ictimaiyyətinə ötürmə missiyasını aparan qəzetdir. “Yeni Azərbaycan” hazırda sayı 700 mindən çox olan Yeni Azərbaycan Partiyasının üzvləri ilə bərabər, Azərbaycan xalqının oxuduğu bir qəzetdir. Qəzet ümumi-kütləvi auditoriyaya müraciət edən çoxtirajlı qəzetlərdən, milli media nümunələrindən biridir.
Əlbəttə ki, qəzetimizin bu cür populyarlıq qazanması və özünəməxsus ciddi imic formalaşdırması YAP rəhbərliyinin, icra katibinin tövsiyyələri əsasında baş tutmuşdur. Bu gün milli media təkcə xəbər ötürücüsü deyil, eyni zamanda milli və informasiya təhlükəsizliyini təmin edən əsas vasitələrdən biridir. “Yeni Azərbaycan” digər milli mətbu nümunələrimiz kimi üzərinə düşən bu missiyanı yerinə yetirməyə çalışır. Bu gün Azərbaycan mediası məhz Azərbaycan prezidentinin diqqəti və qayğısı ilə əhatə olunub. Biz bilirik ki, milli mediamızın inkişafı üçün Azərbaycan prezidenti xüsusi siyasət həyata keçirir. Jurnalistlərin peşə nüfuzunun artırılması üçün tədbirlər görür, onların məişət və maddi problemlərinin həlli ilə bağlı xüsusi siyasət həyata keçirir. Eyni zamanda, medianın inkişafı ilə əlaqədar ixtisaslaşmış xüsusi qurum yaradılıb. Bu, Kütləvi İnformasiya Vasitələrinin İnkişafına Dövlət Dəstəyi Fondudur. Siyasi mövqeyindən asılı olmayaraq, Azərbaycan mediasının bütün nümunələri ciddi şəkildə maliyyələşdirilir. Azərbaycan prezidenti medianın böyük hamisi və qayğıkeşidir. “Yeni Azərbaycan” qəzeti də 24 yaşında digər media nümunələri kimi bu gün də o qayğını hiss edir”.
Hikmət Babaoğlu həmçinin, “Yeni Azərbaycan” qəzetinin gələcək planlarından da danışıb.
“Bu gün qəzet dedikdə gözümüzün önündə təkcə çap məhsulları canlanmır. Milli qəzet nümunələrimizin demək olar ki, hamısının internet səhifələri, Facebook və Twitter hesabları var. Milli media öz missiyasını təkcə kağız üzərində deyil, eyni zamanda internet resursları üzərində də həyata keçirir. Əlbəttə ki, əgər qəzet dünyada baş verən proseslərlə ayaqlaşmaq istəyirsə, mütləq mövcud texnologiyaların imkanlarını, hazırkı operativ oxucu tələbatını nəzərə almalıdır. “Yeni Azərbaycan” da hazırda elektron səhifəsi olan qəzetlərdən biridir. Həmçinin sosial şəbəkələrdə səhifələri fəaliyyət göstərir. Gələcək planlarımız, əlbəttə ki, hər bir milli media nümunəsi kimi millətimizin informasiya təhlükəsizliyinin keşiyində durmaqdan, partiyamızın, dövlətimizin, xalqımızın maraqlarını informasiya mübarizəsi rəqabəti platformasında həyata keçirməkdən ibarətdir. Ən əsası isə, hazırda qlobal informasiya məkanında milli informasiya məkanızımızı təhdid edən bu və digər informasiya məhsullarına qarşı mübarizə aparmaq və onlara qarşı öz auditoriyasını maarflərdirməkdir. Çünki bu gün milli təhlükəsizliyinin ən əsas komponentlərindən biri məhz informasiya təhlükəsizliyidir”.
Günay Rəsulqızı
