Ekspertlər Azərbaycana idxal olunan avtomobillərin sayının kəskin azaldığını bildirsələr də, rəsmi rəqəmlər ölkəyə gətirilən nəqliyyat vasitələrinin sayının artdığını göstərir.
Modern.az Dövlət Gömrük Komitəsinin rəsmi məlumatlarına əsasən bildirir ki, 2017-ci ilin ilk 3 ayında Azərbaycana 2903 avtomobil idxal edilib. İdxal olunan avtomobillərin sayı yanvarda 469, fevralda 1003, martda isə 1431 olub.
2016-cı ilin analoji dövründə isə cəmi 2620 avtomobil idxal olunub. Ötən il ölkəyə idxal olunan avtomobillərin sayı yanvarda 437, fevralda 821, martda 1362 olub.
2017-ci ilin ilk 3 ayında idxal edilən 2903 avtomobildən 35-i sürücü daxil olmaqla 10 nəfər və ya daha çox adam daşımaq üçün nəzərdə tutulmuş motorlu nəqliyyat vasitələri;
2457 ədədi əsasən adamların daşınması üçün nəzərdə tutulmuş minik avtomobilləri və digər motorlu nəqliyyat vasitələri;
375 ədədi yük daşımaq üçün motorlu nəqliyyat vasitələri;
38 ədədi xüsusi təyinatlı motorlu nəqliyyat vasitələridir.
Gülşən RAUFQIZI
